,,ლეიბორისტული პარტიის” თავმჯდომარე, შალვა ნათელაშვილი პარტიის ოფისში გამართულ საგანგებო ბრიფინზე მწვავე შეფასებას აკეთებს რუსეთის უშიშროების საბჭოს თავმჯდომარის მოადგილის, დიმიტრი მედვედევის განცხადებაზე. ოპოზიციონერი ლიდერი, მედვედევის დაპატიმრების მოთხოვნით მიმართავს საერთაშორისო სისხლის სამართლის სასამართლოს, ხოლო დასავლეთს – ივანიშვილისა და მმართველი პარტიის ლიდერებისთვის სანქციების დაწესებისთვის:
,,მას შემდეგ, რაც საქართველოს ოლიგარქიული, პრორუსული რეჟიმი საბოლოოდ გაკოტრდა და იქცა საერთო სახალხო სიძულვილის ობიექტად, მას მხსნელად კვლავ მოევლინა კრემლი, ამჯერად პუტინის “ტყუპისცალ”, ექსპრეზიდენტ დიმიტრი მედვედევის სახით, რომელმაც გააფრთხილა ქართული და მსოფლიო თანამეგობრობა, რომ თუ შეექმნება საფრთხე ოლიგარქ ივანიშვილსა და მის მჩაგვრელ რეჟიმს, მაშინ რუსეთი აფხაზეთისა და ცხინვალის რეგიონს მიიერთებს თავის შემადგენლობაში. თითქოს ახლა არ ჰქონდეს მიერთებული
მივმართავ საერთაშორისო სისხლის სამართლის სასამართლოს – გაეცით დაპატიმრების სანქცია დიმიტრი მედვედევზე ისევე, როგორც ეს განახორციელეთ რუსეთის პრეზიდენტ პუტინზე უკრაინაში აგრესიისათვის. უკრაინაზე ადრე საქართველო იყო და მაშინ რომ არ მოხდა რეაქცია, იმიტომ მოხდა მერე უკრაინა.
მივმართავ აშშ-ის პრეზიდენტს, ბაიდენს და ევროკავშირის ხელმძღვანელობას – დააჩქარეთ ივანიშვილის, მისი უმრავლესობის წევრების, დეპუტატების, მინისტრების, სპეც.სამსახურების ხელძღვანელთა სანქცირება. ჩამოართვით მათ თქვენთან გამოტანილი, დაბანდებული ქონება ბანკებში, აქციებში, დაადეთ სავიზო შეზღუდვები, მოახდინეთ მათი სრული იზოლირება.
პარლამენტის წევრებს, ოქროს პლიაჟებზე წამოწოლილებს, მოვუწოდებ – შეწყვიტეთ დასვენება, სასწრაფოდ მოიწვიეთ პარლამენტის რიგგარეშე სხდომა და გამოხატეთ თქვენი პოზიცია იმ ფაქტზე, რომელიც ეხება ჩვენი სამშობლოს შემდგომ დაშლა, განადგურებას“, – განაცხადა შალვა ნათელაშვილმა.
ავტორი
ნინი ხიჯაკაძე
