“იმედი მაქვს, რომ ახალი ელჩი დიდ როლს შეასრულებს არჩევნების სამართლიანად ჩატარებაში და პლიუს, ივანიშვილის დასანქცირების დაჩქარებაში” – შალვა ნათელაშვილი

ამერიკის შეერთებული შტატების სენატის გადაწყვეტილებით, საქართველო აშშ-ს ელჩი, კელი დეგნანი ვადაზე ადრე დაასრულებს ქვეყანაში დიპლომატიურ საქმიანობას და მის ადგილს რობინ დანიგენი დაიკავებს. აღნიშნულ თემაზე საგანგებო ბრიფინგზე განცხადება გააკეთა ,,ლეიბორისტული პარტიის” თავმჯდომარემ, შალვა ნათელაშვილმა:

,,ძვირფასო მეგობრებო, აშშ-ის სენატმა დაამტკიცა ახალი ელჩი საქართველოში. მე მინდა, მადლობა გადავუხადო შეერთებული შტატების პრეზიდენტის ადმინისტრაციას, რომელმაც გაითვალისწინა, მათ შორის, ჩვენი თხოვნა, ვადამდე გაეწვია მოქმედი ელჩი, ქალბატონი კელი დეგნანი, რომელმაც დიდი წვლილი შეიტანა 2020 წლის გაყალბებული არჩევნების დაკანონებაში და გადამწყვეტი როლი შეასრულა, რათა პროტესტზე მდგარი ოპოზიციური პარტიები შესულიყვნენ პარლამენტში და გადაერჩინათ ის რუსი ოლიგარქი, რომელსაც დღეს არა მარტო ქართველი ხალხი, არამედ შეერთებული შტატები და ევროპა არა მარტო ებრძვის, არამედ ეძებს გზებს, როგორ მოიცილოს თავიდან.

მე მინდა ვუსურვო ახალ ელჩს წარმატებები, წარსულის შეცდომათა გათვალისწინება მისი წინამორბედებისა. იმედი მაქვს, რომ ახალი ელჩი, რომელსაც ეკავა სახელმწიფო დეპარტამენტში მაღალი თანამდებობები და კურირებდა აღმოსავლეთ ევროპას, იცის ჩვენი სპეციფიკა შესანიშნავად, დიდ როლს შეასრულებს არჩევნების სამართლიანად ჩატარებაში და პლიუს, ივანიშვილის დასანქცირების დაჩქარებაში, რასაც მაქსიმალურად აფერხებდა, სამწუხაროდ, მოქმედი ელჩი.

აი, ასეა – პატარა ქვეყნის დაშვებული შეცდომები, შედარებით პატარა შედეგებით მთავრდება. აი, დიდი სახელმწიფოს შეცდომები ზოგჯერ იწვევს უფრო მძიმე შედეგებს. შეერთებული შტატები არის ჩვენი სტრატეგიული პარტნიორი, ამიტომ ჩვენ ყოველთვის ველოდებით, რომ აქ დანიშნული ელჩი და წარმომადგენლები იქნებიან ამ სტრატეგიული პარტნიორობის დონის. ისინი იქნებიან არბიტრები, მიუმხრობლები და არ დაიკავებენ არაობიექტურ პოზიციებს. უპირველესად, არ გაუწევენ ლობირებას იმ ხელისუფლებას, რომელიც ამის ღირსი არ არის”, – განაცხადა შალვა ნათელაშვილმა.

ავტორი
ნინი ხიჯაკაძე