გუშინ, რუსეთში განვითარებულ მოვლენებთან დაკავშირებით საქართველოს პრეზიდენტის, სალომე ზურაბიშვილისა და ოპოზიციური სპექტრის განცხადებებს კრიტიკულად აფასებს პარტია ,,ქართული ოცნების“ თავმჯდომარე, ირაკლი კობახიძე:
,,გუშინ, ზოგადად, ყველამ ვნახეთ ერთიანად ამჩატებული ოპოზიცია. ეს იყო ამჩატებული ,,ნაცები“, ,,ევრონაცები“, ხაზარაძე, გახარია, ,,გირჩელები“, სალომე ზურაბიშვილი და ა.შ. როდესაც ჭკუა არ გყოფნის, რომ სწორად გააანალიზო მოვლენები, იმაზე მაინც უნდა გეყოს ჭკუა, რომ საერთოდ გაჩუმდე.
გუშინ, მოვისმინეთ უამრავი სისულელე, ყველაფერთან ერთად. აქ საუბარი იყო უსაფრთხოების საბჭოს მოწვევაზე, მეორე ფრონტზე – პირდაპირი მოწოდებები მეორე ფრონტთან დაკავშირებით. რეალურად, ეს არის ,,ნაც.მოძრაობის“ კოლექტიური ოპოზიციის სახე, რაც ძალიან სამწუხაროა. ერთი წამით წარმოიდგინეთ, ეს ადამიანები რომ ყოფილიყვნენ გუშინ ხელისუფლების სათავეში, ქვეყანას უბედურებაში გახვევდნენ.
ხომ გაირკვა გუშინ, უკვე გვიან, რომ ეს ყველაფერი იყო უბრალოდ სისულელე. სისულელე და მეტი არაფერი, მაგრამ ამ სისულელეს, გუშინ, ამბობდა ადამიანი, რომელსაც ჰქვია საქართველოს პრეზიდენტი -ჭკუა იმაზე მაინც უნდა გეყოს, რომ გაჩუმდე, როცა ანალიზის უნარი არ გაქვს.
ეს ჭკუა ვერ გამოავლინა ვერც პრეზიდენტმა, ვერც ოპოზიციის ლიდერებმა – ვერცერთმა ვერ გამოავლინა. ამ სისულელეს ითხოვდნენ გუშინ, მთელი დღის განმავლობაში. რა საზღვრების ჩაკეტვა?! ჩასაკეტი იყო საზღვრები?! – ეს ხომ სისულელე იყო“, – განაცხადა ირაკლი კობახიძემ.
ავტორი
ნინი ხიჯაკაძე
