პარლამენტის წევრი, “სტრატეგია აღმაშენებლის” გენერალური მდივანი, პაატა მანჯგალაძე პოლიტიკურ შეფასებას აკეთებს ქვეყანაში შექმნილ რეალობასთან დაკავშირებით და პროდასავლურ ოპოზიციას ერთიანობისკენ მოუწოდებს. ოპოზიციონერ ლიდერს მიაჩნია, რომ მხოლოდ კოორდინირებისა და საერთო ძალისხმევითაა შესაძლებელი ხელისუფლების დამარცხება:
“სამწუხაროა, რომ ზოგიერთი კოლეგა ოპოზიციიდან ეხმარება და აძლიერებს “ქართული ოცნების” ნარატივს, რომ არცერთ შემთხვევაში, მიუხედავად არსებული მძიმე ვითარებისა, არ გააერთიანებენ ძალისხმევას საქართველოს ამ რთული ვითარებიდან გამოყვანისთვის.
მოცემულ ვითარებაში, როცა სახეზეა საქართველოში რუსული გავლენების გაძლიერება, ყოველ დღე თავს ესხმიან ჩვენს დასავლელ პარტნიორებს, რომლებიც არიან ჩვენი უსაფრთხოებისა და მშვიდობის გარანტორები და ზარზეიმით, ლანგრით ეგებებიან საქართველოს დაშლისა და დანაწევრების პოლიტიკის მთავარი შემოქმედი პირის, ლავროვის ოჯახის წევრებს, როცა საქართველო კადიროველების თარეშის ადგილად აქციეს, ამ დროს ჩემთვის გაუგებარია გამოვიდეს ოპოზიციის რომელიმე ლიდერი და განაცხადოს რომ არ ითანამშრომლებს სხვა ოპოზიციასთან.
მესმის, “ქართული ოცნება” რატომ ახდენს ოპოზიციის კოორდინაციისა და საერთო ძალისხმევის თემის ტორპედირებას – მათ ეშინიათ ოპოზიციის მწყობრი ქმედებების და ურჩევნიათ დაქსაქსული ოპოზიცია, რომელიც ვერაფერზე იპოვის საერთო ენას, ეს კი ნამდვილად არის დამარცხების ფორმულა. მით უმეტეს, როცა საუბარია არა პარტიების შერწყმაზე ან სიებზე ან საარჩევნო ნომერზე, არამედ ოპოზიციის კოორდინაციაზე და საერთო ძალისხმევაზე, რომ ამ საგანგებო ვითარებაში ჩვენი ნაბიჯები იყოს შეთანხმებული და შესაბამისი. თუ ვინმე იტყვის, რომ “ნაციონალურ მოძრაობასთან” თანამშრომლობის გარეშე დაამარცხებს ხელისუფლებას ან ილუზიაშია ან სხვების შეცდომაში შეყვანას ცდილობს.
ასევე, “ნაციონალურმა მოძრაობამაც”, როგორც ვიცი, გაიაზრა, რომ სხვა ოპოზიციური ძალების გარეშე ვერ დაამარცხებს “ოცნებას”.
შესაბამისად, საქართველოს გადარჩენაზე უფრო მნიშვნელოვანი სხვა რა ამოცანა არსებობს, რომელიც ხელს უშლის კოორდინაციას, მე არ მესმის.
საერთო ძალისხმევას ალტერნატივა არ აქვს, სხვაგვარად შეუძლებელია რუსების დამარცხება, საქართველოს გამთლიანება და ევროპაში ინტეგრაცია”, – განაცხადა პაატა მანჯგალაძემ.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
