დღეს, პარლამენტში გამართულ პლენარულ სხდომაზე იუსტიციის უმაღლეს საბჭოში ვაკანტური 5 ადგილიდან 3 არამოსამართლე წევრი აირჩიეს. სხდომის დეტალებზე და სკანდალური კენჭისყრის შედეგებზე კომენტარი გააკეთა პარლამენტის წევრმა, რომან გოცირიძემ:
,,მთელი ოპოზიცია იყო შეთანხმებული, რომ არ დაუჭერდა მხარს იმ კანდიდატებს, რომლებიც ,,ქართული ოცნების“ მონა-მორჩილი იქნებოდა და ქვეყანაში პოლიტიკურ მართლმსაჯულებას განახორციელებდა.
შედეგად მოხდა 2 რამ: ან გაიყიდა 5 ადამიანი, ვინაიდან 5-მა ოპოზიციონერმა მისცა ხმა ან პროგრამაში მანიპულაცია მოხდა.
ასეთი რამ ფულის გარეშე არ ხდება, მეგობრებო. ეს არის რა – ფული მარტო ჯოჯხეთს კი არ ანათებს, ფული ზოგიერთი ოპოზიციონერის, ასე ვთქვათ, ტვინსაც აბნელებს“, – განაცხადა რომან გოცირიძემ.
ინფორმაციისთვის: როგორც კონსტიტუციითაა განსაზღვრული, იუსტიციის უმაღლესი საბჭოს წევრის არჩევა ხდება პარლამენტის მიერ, სრული შემადგენლობის არანაკლებ სამი მეხუთედით, ანუ მინიმუმ 90 ხმით. მმართველ პარტიას, სრული მობილიზების შემთხვევაში ჰქონდა 84 ხმა, ამას დაემატა საპარლამენტო ჯგუფ “ევროპელი სოციალისტების” 4 ხმა, თუმცა მმართველი პარტიის ორმა კანდიდატმა მიიღო 93 ხმა, რაც ოპოზიციის ხმების გარეშე ვერ მოხერხდებოდა.
P.S. დღის ბოლოს გავრცელდა ინფორმაცია, რომ ოპოზიციიდან ხუთმა დეპუტატმა ხმა მისცა კენჭისყრისას:
ნიკა მაჭუტაძე, ნატო ჩხეიძე, როსტომ ჩხეიძე, ბაჩუკი ქარდავა და დილარ ხაბულიანი.
ავტორი
ნინი ხიჯაკაძე
