მედიასთან კომენტარში, საქართველოს მთავრობის მეთაურმა, განმარტებები გააკეთა მმართველი პარტიის მიერ გაკეთებულ საგანგებო განცხადებასთან დაკავშირებით “ევროპის სოციალისტური პარტიის” დატოვების თაობაზე:
“ეს პარტია, ეს გაერთიანება, ნელ-ნელა ტრანსფორმირდა და ჩვენი გზები გაიყო – იგივე იდეოლოგიურ ნაწილში, იგივე მათ პოლიტიკაში, მათ განცხადებებში, მათ მხარდაჭერაში… ნული მხარდაჭერა! იგივე რეზოლუციები რომ მიიღო ევროპარლამენტმა – სამარცხვინო, უსამართლო და ჩაგვიწერეს, რომ თურმე ჩვენი პარტიის თავმჯდომარე, ბატონი ბიძინა ივანიშვილი პრობლემას წარმოადგენს ქვეყნისთვის, – კაცმა, რომელმაც ეს მშვიდობა მოიტანა და ქვეყანა გადაარჩინა და კაცი, რომელმაც ოკუპაცია მოუტანა ქვეყანას, რუსის ჯარი დააბრუნა, 20% ჩააბარა და ათასი უბედურება დამართა ქართველ ხალხს – აწამა, გააუპატიურა და დატანჯა, თურმე მის მიმართ არის უსამართლობა.
ასეთ უმსგავსო რეზოლუციას დაუჭირეს მხარი, დიდმა ნაწილმა, ამ პარტიის 30-მა პროცენტმა. მაშინ გაჩნა პირველი ბზარი და მანამდეც უკვე დაწყებული იყო – ეს ერთი და მერე მეორე – ჩაწერეს იქვე გვარამია, კეზერაშვილი, მძარცველი კაცი, რომელმაც მთელი ევროპა გაუძარცვა, პენსიონერები გაძარცვა და ისევ კეზერაშვილს იცავენ.
იგივე ახლა, – მე წავედი ამერიკის რესპუბლიკური პარტიის შეკრებაზე უნგრეთში, CPAC-ზე, სადაც პრეზიდენტები დადიან ამერიკის და კონგრესმენები, ძალიან ბევრი გამოჩენილი პოლიტიკოსი… დაგმეს ჩემი მონაწილეობა, ორი განცხადება მიუძღვნეს, რომ როგორ გავბედე, თურმე, თქვეს, რომ ანტი-LGBT ფრაზები გამოიყენაო და ამ ეროვნულ კონსერვატიულ კონფერენციაში მივიღე მონაწილეობა.
უკაცრავად მეგობრებო, ჩვენ ვართ ასეთები, ჩვენ ასეთი საქართველო გვინდა, ასეთი ხალხი ვართ კონსერვატიული, ეროვნული, ოჯახური ფასეულობების დამცველი და თუ მათ ამის გამო უნდათ, რომ ჩვენ აღარ ვიყოთ [გაერთიანების წევრები], კარგად იყვნენ, წარმატებას ვუსურვებთ“, – განაცხადა ირაკლი ღარიბაშვილმა.
