საქართველოს პრეზიდენტმა, სალომე ზურაბიშვილმა 7-9 მარტის საპროტესტო აქციაში მონაწილე ,,ქალი ევროკავშირის დროშით” ღირსებით მედლით დააჯილდოვა. ნანა მალაშხიამ სიტყვით გამოსვლის დროს მადლობა გადაუხადა პრეზიდენტსა და მოსახლეობას:
,,მინდა, მადლობა ვუთხრა აქციის თითოეულ მონაწილეს, რომელიც გამოვიდა “რუსული კანონის” წინააღმდეგ და დაიცვა ჩვენი ქვეყნის ევროპული მომავალი.
მადლობა, ქალბატონო პრეზიდენტო, რომ თქვენ დღეს დგახართ საქართველოს მოქალაქეების გვერდით და კარგად გესმით ჩვენი ხალხის დაკვეთა, გავხდეთ ევროპული ოჯახის წევრი. იმ ევროპული ოჯახისა, სადაც არსებობს დამოუკიდებელი და სამართლიანი სასამართლო, თავისუფალი – პოლიტიკურად მოტივირებული გადაწყვეტილებებისაგან, სადაც სრულად დაცულია მედიის თავისუფლება, ქალთა და უმცირესობების უფლებები, უამრავ სხვა სიკეთესთან ერთად, რასაც ქვეყნის უსაფრთხოება, კეთილდღეობა ჰქვია.
მინდა მადლობა გითხრათ იმ განცხადებებისთვის, რომელსაც თქვენ აჟღერებთ უკრაინის მიმართ. ის სრულ თანხვედრაშია საქართველოს მოქალაქეების ურყევ მხარდაჭერასთან და სოლიდარობასთან უკრაინასთან დაკავშირებით.
ვფიქრობ, რომ თქვენ გამოიყენებთ ყველა რესურს და ბერკეტს ქვეყნისათვის ამ ურთულეს მომენტში. აუცილებლად, ჩვენ ერთ დღესაც გავხდებით NATO-სა და ევროკავშირის წევრი.
მე ამის მჯერა!
დიდება საქართველოს! დიდება ჩვენ გმირებს! დიდება უკრაინას!”, – განაცხადა ნანა მალაშხიამ.
ავტორი
ნინი ხიჯაკაძე
