“იმედი მაქვს, ვიცოცხლებ იმდენ ხანს, რომ ვიხილო ეს ახალი სამყარო – ოლიგარქების, ავტოკრატების და შიშის გარეშე” – მიხეილ სააკაშვილი

მიხეილ სააკაშვილს ნორვეგიელი პოლიტიკოსის შურ ლინდერბრექეს სახელობის პრიზი გადაეცა. ჯილდო, სიმბოლურად, მესამე პრეზიდენტის ოჯახის წევრებმა ჩაიბარეს, შვილმა, ნიკოლოზ სააკაშვილმა კი მამის წერილი წაიკითხა:

„ჩემთვის დიდი პატივია ადამიანის უფლებების და დემოკრატიის უმაღლესი სტანდარტის ქვეყნისგან ჯილდოს მიღება, ადამიანის უფლებებისთვის და დემოკრატიისთვის ბრძოლის საქმეში.

ამ პრემიამ ნორვეგიისგან უნდა დააფიქროს ზოგიერთი ჩვენი თანამოქალაქე, რომელიც წლების განმავლობაში წამოეგო ჩემი გაშავების კამპანიას. უნდა დაფიქრდნენ ისინი, ვისაც ჩემი სრულიად უსამართლო და სამარცხვინო პატიმრობა დემოკრატიის და ადამიანის უფლებების საკითხად კი არა, რაღაც პოლიტიკურ გარჩევად მიაჩნია.

ის, რომ ჩემს პატიმრობაზე ამხელა ნეგატიური რეაქციაა მთელ ცივილიზებულ სამყაროში და პოზიტიური მხოლოდ კრემლში და “ოცნებაში”, თითოეული ქართველის განსჯის საგანი უნდა იყოს.

მჯერა, რომ მსოფლიო უნდა არსებობდეს ოლიგარქების, ავტოკრატების და შიშის გარეშე. იმედი მაქვს, ვიცოცხლებ იმდენ ხანს, რომ ვიხილო ეს ახალი სამყარო“, – აღნიშნავს მიხეილ სააკაშვილი.