ევროპაში სამუშაო ვიზიტით მყოფი სამი ოპოზიციური პარტია “სტრატეგია აღმაშემებელი”, “დროა” და “გირჩი მეტი თავისუფლება” შეხვედრებს მართავს სხვადასხვა დონეზე. მორიგი შეხვედრის შემდეგ პოლიტიკურ შეფასებებს აკეთებს პარტია “სტრატეგია აღმაშენებლის” თავმჯდომარე, გიორგი ვაშაძე:
“შევხვდით ევროპარლამენტის წევრებს, რენიუს პოლიტიკური ჯგუფიდან, რომლებიც ევროპარლამენტში უნგრეთს, რუმინეთს და დანიას წარმოადგენენ.
ვისაუბრეთ საქართველოში მიმდინარე პროცესებზე, განსაკუთრებით ხაზი გაესვა რუსულ კანონთან დაკავშირებულ საკითხს და საქართველოს ევროინტეგრაციის პერსპექტივებს.
ევროპარლამენტარების ძირითადი გზავნილია, რომ ფასადური რეფორმებით და ფასადური ცვლილებებით ევროკავშირში ინტეგრაცია ვერ მოხდება, ამიტომ საჭიროა რეალური რეფორმები „ქართული ოცნების“ მხრიდან!
მეორე, მნიშვნელოვანი საკითხი იყო ის, რომ ყველამ დაინახა, საქართველოს მოსახლეობა იმსახურებს ევროკავშირის წევრობას და განსხვავებით ხელისუფლებისგან, მომართულია ევროპისკენ.
და კიდევ ერთი დასკვნა – „ქართული ოცნება“ არ გამოხატავს ქართველი ხალხის ნებას და არ არის მოტივირებული წაიყვანოს ქვეყანა ევროპისკენ”, – აცხადებს გიორგი ვაშაძე.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” მედიასთან და საზოგადოებასთან ურთიერთობის სამსახური ავრცელებს
