მთავრობის ეკონომიკურ საბჭოზე სხდომის მონაწილეებმა იმსჯელეს “ევრო 5”-ის ავტომობილების სავალდებულო სტანდარტის დანერგვაზე, რომლის მიხედვითაც “ევრო 5”-ზე დაბალი სტანდარტის მანქანების შემოყვანა 2024 წლიდან შეიზღუდება, რაც 2013 წლამდე გამოშვებულ მანქანებს შეეხება. აღნიშნულ საკითხზე შეფასებას აკეთებს ,,საქართველოს ავტო იმპორტიორთა ასოციაციის” თავმჯდომარე ლაშა დარბაისელი:
,,2013 წლამდე გამოშვებული ავტომობილების შემოყვანა შესაძლოა აიკრძალოს. მთავრობის ამგვარი გადაწყვეტილებით არა მარტო ჩვენს სექტორს დავაზიანებთ, არამედ ქართველ მომხმარებელს და მყიდველს, რომელსაც საშუალება არ აქვს, რომ 2013 წლის ზემოთ, მაგალითად, 2014-დან 2022 წლამდე წარმოებული ავტომობილი შეიძინოს.
ამ ეტაპზე, ჩვენი ქვეყნის მოსახლეობა არ არის მზად, რომ შეიზღუდოს “ევრო 5”-ზე დაბალი სტანდარტის მანქანების შემოყვანა. იმ ფონზე, როცა საქართველო აქტიურად მუშაობს რეექსპორტზე, ამ ცვლილების მიღებით, საქონლის რეექსპორტზე გატანის დამოკიდებულება კიდევ უფრო გაიზრდება.
2013 წლის ქვემოთ წარმოებულ ავტომობილებს ქვეყანაში დიდი რაოდენობა უჭირავს. შესაბამისად, 2013 წელს ქვემოთ წარმოებული ავტომობილების იმპორტის შეზღუდვა გამოიწვევს, როგორც ავტომობილების ბიზნესის, ისე მოსახლეობის დაზარალებას.
არ შეიძლება, რომ ავტომობილების მდგომარეობის განსაზღვრა მოხდეს წლოვანების მიხედვით. შესაბამისად, რეგულაციის მიღება უნდა მოხდეს იმ ფორმით, რომელიც გამოასწორებს დღევანდელ რთულ მდგომარეობას”, – განაცხადა ლაშა დარბაისელმა.
ავტორი
ნინი ხიჯაკაძე
