“ზოგადი მდგომარეობიდან გამომდინარე, ეს ყველაფერი შეიცავს გარკვეულ რისკებს, ყველა მიმართულებით” – ზურაბ ჩხაიძე მიხეილ სააკაშვილზე

საქართველოს მე-3 პრეზიდენტს გუშინ კორონავირუსი დაუდასტურდა. მიხეილ სააკაშვილის ჯანმრთელობის მდგომარეობასა და მკურნალობის პროცესთან დაკავშირებით კომენტარს აკეთებს სამედიცინო ცენტრ ,,ვივამედის“ კლინიკური დირექტორი, ზურაბ ჩხაიძე. მისი განცხადებით, ამ ეტაპზე პაციენტის მდგომარეობა სტაბილურია:

,,გუშინვე შეიკრიბა ექიმთა კონსილიუმი, სხვადასხვა სპეციალობის ექიმების შემადგენლობით. მისი დაავადებიდან გამომდინარე, კონსილიუმში მონაწილეობდა ჰემატოლოგი, რეანიმატოლოგი, მკურნალი ექიმი და ინფექციონისტი. შესაბამისად, შეთანხმებული იქნა მკურნალობის გეგმა – სამკურნალო, პრევენციული და მიმდინარეობს მკურნალობა.

კონსილიუმის გადაწყვეტილებით, პაციენტი რჩება პალატაში და უგრძელდება მკურნალობა. პალატა აღჭურვილი არის ყველა იმ აპარატურით, რაც არის ინტენსიურ პალატაში.

რა თქმა უნდა, მისი ზოგადი მდგომარეობიდან გამომდინარე, ეს ყველაფერი შეიცავს გარკვეულ რისკებს, ყველა მიმართულებით. პროგნოზის გაკეთება ძალიან რთულია. მოსალოდნელი რისკები, რა თქმა უნდა, არსებობს, მაგრამ, ამ ეტაპზე, მდგომარეობა არის სტაბილური და არის კოვიდის ასეთი მსუბუქი ფორმით გამოვლინება.

დაავადების გარეშეც კოვიდი რთულდება, მითუმეტეს, როდესაც აქ არის ასეთი ფონი“, – განაცხადა ზურაბ ჩხაიძემ.

ავტორი
ნინი ხიჯაკაძე