აღდგება თუ არა რუსეთთან პირდაპირ ფრენები, ამასთან დაკავშირებით პოლიტიკურ შეფასებას აკეთებს პარლამენტის ადამიანების უფლებათა და სამოქალაქო ინტეგრაციის კომიტეტის თავმჯდომარე, მიხეილ სარჯველაძე. მისი განცხადებით, დიპლომატიური თვალსაზრით, დამოკიდებულია იმაზე თუ რა ფორმით მოხდება პოზიციის შემუშავება:
,,იმ ფონზე, როდესაც არსებობს მოცემულობა, ლარსზე შესაძლებელია, რომ მაგალითად, მანქანით იმოგზაუროს რუსეთის მოქალაქემ საქართველოში ან საქართველოს მოქალაქემ რუსეთში – ერთი მხრივ, სავიზო რეჟიმი არსებობს, მეორე მხრივ, არ არსებობს და ა.შ. ასეთ პირობებში ტექნიკურად ახალი არხის გახსნა, ასე ვთქვათ, რომელიც შესაძლებლობას მისცემს, მაგალითად, ქართველ მოსახლეობას, რომელიც ცხოვრობს დღეს რუსეთში, იმოგზაურონ საქართველოში საკუთარი ოჯახების მოსანახულებლად, არა მაგალითად სომხეთის ან აზერბაიჯანის გავლით, არამედ იმოგზაურონ პირდაპირ – ამაში მე პირადად, ვერავითარ პრობლემას ვერ ვხედავ პირიქით, ეს არის მეტი კომფორტის შექმნა.
დიპლომატიურს რაც შეეხება – ჩემთვის პირადად, ყველაფერი დამოკიდებულია შინაარსზე. იმიტომ, რომ ურთიერთობა დღეს, მაგალითად, იგივე ჰუმანიტარული მოტივებიდან გამომდინარე, რუსეთის ფედერაციასთან ირიბი არხებით, მაგრამ, მაინც არსებობს.
შესაბამისად, რა ფორმით იქნება, რა საშუალებებით იქნება, რა შინაარსით იქნება, მათ შორის, ასეთი ურთიერთობები, ამაზეა ყველაფერი დამოკიდებული”, – განაცხადა მიხეილ სარჯველაძემ.
ავტორი
ნინი ხიჯაკაძე
