რუსეთთან ფრენების აღდგენასთან დაკავშირებით, საქართველოში ამერიკის შეერთებული შტატების ელჩის, კელი დეგნანის ნეგატიურ პოზიციას, მწვავე შეფასებებითა და კონკრეტული რჩევებით ეხმიანება პოლიტიკის მეცნიერების დოქტორი, ანალიტიკოსი ლევან ნიკოლეიშვილი:
“ქალბატონო ელჩო, ორ უფასო რჩევას მოგცემთ და აუცილებლად გამოგადგებათ იმ ქვეყანაში, სადაც კარიერას გააგრძელებთ.
პირველი: ქართველების სახელით საუბარს რომ შეეშვათ და უბრალოდ თქვენი აზრი დააფიქსიროთ, უფრო უპრიანი იქნებოდა. ხალხის სახელით საუბარს ძალიან დიდი ლეგიტიმაცია სჭირდება ამავე ხალხისგან და მემგონი, თქვენ ამ ლეგიტიმაციასთან ძალიან დიდი მანძილი გაშორებთ;
მეორე: რუსეთმა ჯარები უნდა გაიყვანოს ჩვენი ქვეყნიდან, ეს აუცილებელია, თუმცა ეს არაფერ შუაშია ფრენების აღდგენასთან. როდესაც ერთი მეორეს არ გამორიცხავს და მეორე პირველს, არამგონია მსგავსი არჩევნის დაყენება მთლად კეთილსინდისიერი საქციელი“, – წერს ფეისბუქის პირად გვერდზე ლევან ნიკოლეიშვილი.
ინფორმაციისთვის: კელი დეგნანმა, რუსეთის მხარის ინიციატივაზე, საქართველოსთან ავიამიმოსვლის აღდგენასთან დაკავშირებით განაცხადა, რომ “ვფიქრობ, ქართველების უმეტესობას ურჩევნია რუსეთმა საკუთარი ჯარები გაიყვანოს აფხაზეთიდან და ცხინვალიდან, ვიდრე აღდგეს პირდაპირი ფრენები მოსკოვთან“.
