რუსეთში შეერთებული შტატების ყოფილი ელჩი, მაიკლ მაკფოლი ,,ამერიკის ხმასთან” ინტერვიუში საუბრობს საქართველოს მე-3 პრეზიდენტის მძიმე მდგომარეობაზე, თუ როგორ აისახება ქვეყნის ევროპულ მომავალზე მიხეილ სააკაშვილთან დაკავშირებული პროცესები. ამერიკელი დიპლომატის პოზიციის ჟურნალისტებთან შეფასებისას ,,სტრატეგია აღმაშენებლის” პოლიტიკური საბჭოს წევრი, სერგო ჩიხლაძე აღნიშნავს, რომ მიხეილ სააკაშვილის სიკვდილით პრობლემები შეექმნება ქვეყნის ევროპულ მომავალს:
,,თუ მე-3 პრეზიდენტი გარდაიცვლება ციხეში, ეს იქნება საქართველოსთვის უკან გადადგმული ნაბიჯი. ეს ნიშნავს, რომ ჩვენ 20-30 წლით კიდევ დავშორდებით ევროპულ პერსპექტივას და საერთოდ განვითარების ღერძს ავცდებით. ისევე, როგორც ერთხელ მოხდა ეს უკვე 90-იანი წლების დასაწყისში, როდესაც მოხდა პირველი პრეზიდენტის მოკვდინება და ჩვენ ჩამოვრჩით განვითარების პროცესებს.
როდესაც შეგვეძლო, რომ ვყოფილიყავით უფრო წინ, ვიდრე თუნდაც ბალტიის ქვეყნები არიან დღეს, ჩვენ დაშორებული ვართ მათგან რამდენიმე ათეული წლით. იგივე განმეორდება ამ შემთხვევაშიც“, – განაცხადა სერგო ჩიხლაძემ.
ინფორმაციის: ,,ამერიკის ხმასთან” ინტერვიუში რუსეთში შეერთებული შტატების ყოფილმა ელჩმა, მაიკლ მაკფოლმა საქართველოს ხელისუფლების წარმომადგენლების მხრიდან გამოთქმულ კრიტიკას უპასუხა და მოუწოდა, რომ მე-3 პრეზიდენტის სიცოცხლეზე იზრუნონ:
მერწმუნეთ, მე ვიცი შეცდომების შესახებ, რაც პრეზიდენტმა სააკაშვილმა დაუშვა და იმის შესახებაც მას შემდეგ რაც გააკეთა. ის არ არის წმინდანი და არც მისი მტრები არიან წმინდანები. არც დასავლეთია წმინდა იმაზე თუ როგორ მოექცნენ ბატონ სააკაშვილს და საქართველოს. ეს არის დებატები, რომელზეც ისტორიკოსებმა უნდა დაწერონ წიგნები. ეს ჩემი საქმე არაა. ჩემი მიზანია, რომ თავიდან ავიცილოთ, ძალიან, ძალიან ცუდი შედეგი. ეს არ იქნება ცუდი მხოლოდ მათთვის, ვინც მხარს უჭერს სააკაშვილს, ეს იქნება ცუდი ყველა ქართველისთვის, ვისაც სურს იცხოვროს მშვიდობაში, უსაფრთხოებასა და კეთილდღეობაში“, – განაცხადა მაიკლ მაკფოლმა.
ავტორი
ნინი ხიჯაკაძე
