NATO-ს სახმელეთო ძალების ყოფილი სარდლის, ევროპაში ამერიკული ძალების ყოფილი მეთაურის ბენ ჰოჯესის გზავნილებზე კრიტიკულ შეფასებას აკეთებს პარლამენტის ფრაქცია ,,ქართული ოცნების” თავმჯდომარის მოადგილე, რატი იონათამიშვილი:
,,ჩვენ ამ ადამიანის არაერთი განცხადება გვახსოვს, რომელიც პირდაპირ მოუწოდებდა საქართველოს ომში ჩართვას, პირდაპირ გამოთქვამდა საყვედურებს იმისთვის, რომ საქართველოს შეიარაღებული ქმედებები არ აქვს განხორციელებული დღეს, იგივე აფხაზეთსა თუ სამაჩაბლოში. ამით, ფაქტობრივად, ის მავნებლურ განცხადებებს აკეთებდა ჩვენი ქვეყნის უსაფრთხოებიდან გამომდინარე.
ცხადია, ასეთი ადამიანების განცხადებას არანაირი ფასი არ აქვს ჩვენი საზოგადოებისათვის. ის ადამიანები, ვინც ცდილობენ, რომ ასეთი პირდაპირ ომის რიტორიკის და გლობალური ომის პარტიის წევრი გამოიყენონ სპიკერად, ვფიქრობ, რომ ძალიან დიდი შეცდომაა მათი მხრიდან”, – განაცხადა რატი იონათამიშვილმა.
ინფორმაციისთვის: NATO-ს სახმელეთო ძალების ყოფილი სარდალი, ევროპაში ამერიკული ძალების ყოფილი მეთაური ბენ ჰოჯესი ჟურნალისტებთან კომენტარს აკეთებს, სადაც საუბრობს საქართველოს შესახებ:
,,ვისაუბრეთ საქართველოში სამოქალაქო საზოგადოების, თავისუფალი მედიის მნიშვნელობაზე, რომელიც ხელისუფლებას უნდა აკონტროლებდეს, რომ ქართველებს ჰქონდეთ საკუთარი ინსტიტუტების ნდობა.
საფრთხე რუსეთიდან ახლა არ არის სამხედრო ხასიათის. ის უფრო იმაში მდგომარეობს, რომ აქ საზოგადოებაში მოსკოვმა ინფილტრაცია მოახდინა და მასზე გავლენას ახდენს.
ამიტომ საუკეთესო გზა, რომ ქართველებმა თავი დაიცვან, არის ძლიერი ლიბერალური დემოკრატია”, – განაცხადა ბენ ჰოჯესმა.
ავტორი
ნინი ხიჯაკაძე
