“ომეგა ჯგუფის” და “მთავარი არხის” დამფუძნებელი ზაზა ოქუაშვილი სოციალურ ქსელში, ფეისბუქის საკუთარ გვერდზე პოსტს აქვეყნებს მისი ბიზნესის მიმართ კონკრეტული პრობლემების შექმნის თაობაზე:
“ზაზა ოქუაშვილი, “ომეგა ჯგუფის” და “მთავარი არხის” დამფუძნებელი ვაცხადებ, რომ ბიძინა ივანიშვილი, საქართველოს მთავრობის და კლანის მიერ მართული სასამართლოს მეშვეობით, კვლავ აგრძელებს “ომეგა ჯგუფის” საკუთრების უკანონო მიტაცებას.
ომეგა ჯგუფი წარმოადგენს მთელი თავისი აქტივების – როგორც უძრავი, ისე მოძრავი ქონების კანონიერ მესაკუთრეს საქართველოს და საერთაშორისო კანონმდებლობის შესაბამისად. ამ აქტივების ჩამორთმევა და მათი განკარგვის მცდელობები უკანონოა.
გასული წლების და თვეების განმავლობაში, ომეგა ჯგუფის საკუთრების ხელყოფა განხორციელდა როგორც ხელისუფლების, ისე საქართველოს ბანკის მიერ კანონის უხეში დარღვევით, ხოლო ახალი წლის ღამეს, 00 საათსა და 20 წუთზე საქართველოს ბანკის მიერ მობილიზებულმა, პირბადეებით შენიღბულმა ათეულობით პირმა უკანონოდ და ძალისმიერად დაიპყრო ომეგა ჯგუფის ბიზნესის ტერიტორია, “ომეგა მოტორ სითის“ პრემიუმ შოუ-რუმები და სერვის ცენტრები, მთავარი არხის სტუდიები. აღნიშნულმა პირებმა გამოდევნეს დაცვა და რკინის გისოსების დამონტაჟების გზით მოახდინეს ტერიტორიის უკანონო შემოღობვა საპატრულო პოლიციის უმოქმედობის ფონზე, რომელმაც არ შეასრულა თავისი მოვალეობა – აღეკვეთა აშკარა სამართალდარღვევა.
ომეგა ჯგუფი იყო ერთ-ერთი ყველაზე დიდი გადამხდელი, რომელსაც საქართველოს ბიუჯეტში შეტანილი აქვს 1,5 მილიარდი ლარი გადასახადის სახით, ხოლო ინვესტიცია ომეგა ჯგუფში განხორციელებულია ასობით მილიონი ლარის ოდენობით. 2018 წელს, ხელისუფლების მიერ ფაბრიკის გაჩერებამდე ომეგა ჯგუფში დასაქმებული იყო 1700 თანამშრომელი, რომელთა ნაწილი დღეს ან უმუშევარია ან წასულია ემიგრაციაში.
როგორც დიდი ბრიტანეთის მოქალაქე საქართველოს ფარგლებს გარეთ ვაგრძელებ სამართლებრივ ბრძოლას ჩემი, როგორც ინვესტორის დარღვეული უფლებების აღსადგენად საქართველოს მთავრობის, ბიძინა ივანიშვილის და სხვა კონკრეტული პირების წინააღმდეგ. ეს ბრძოლა სამომავლოდ ასევე მიმართული იქნება საკუთრების უფლების უგულვებელყოფის თითოეულ გამოვლენასთან დაკავშირებით.
ვაფრთხილებ, საკუთრების უხეში ხელყოფის გზით წართმეული ომეგა ჯგუფის სხვადასხვა ქონების (მათ შორის, დავით აღმაშენებლის ხეივანზე მდებარე, “ომეგა მოტორ ჯგუფის” შოურუმები, რომლებიც განკუთვნილი იყო ბენტლის, ბეემვე-მინის და მაზერატის, ასევე “მთავარი არხის” სტუდიების ფუნქციონირებისთვის) პოტენციურ შემძენებს, რომ ისინი არ ჩაითვლებიან კეთილსინდისიერ მყიდველებად და ავტომატურად გახდებიან იმ უკანონო კონსპირაციის მონაწილე, რასაც ბოლო წლების მანძილზე ახორციელებს ივანიშვილი ჩემი, როგორც ომეგა ჯგუფისა და მთავარი არხის დამფუძნებლის წინააღმდეგ“, – აცხადებს ზაზა ოქუაშვილი.
