ჩამოერთმევათ თუ არა საქართველოს მოქალაქეობა უკრაინაში მებრძოლ ქართველებს, ამასთან დაკავშირებით ჟურნალისტებთან პოლიტიკურ შეფასებას აკეთებს პარლამენტის იურიდიულ საკითხთა კომიტეტის თავმჯდომარე ანრი ოხანაშვილი:
,,მამუკა მდინარაძემ, საქართველოს კანონმდებლობაზე დაყრდნობით, ახსნა, რომ თუკი ჩვენი ქვეყნის მოქალაქე შევა სხვა ქვეყნის სამხედრო ძალებში, ამას კანონმდებლობა ითვალისწინებს, რომ ეს შეიძლება გახდეს მოქალაქეობის დაკარგვის საფუძველი.
ამას რომელიმე პოლიტიკური გუნდი კი არ წყვეტს, ეს გადაწყვიტა ქართულმა კანონმდებლობამ.
თუ ვინმე X ადამიანი ჩვენ მოქალაქეებს ატყუებს იმას, რომ ჩაიყვანს უკრაინაში და მათ გააწევრიანებს უკრაინის შეიარაღებულ ძალებში, ამას არ აკეთებს – ეს გასარკვევია“, – განაცხადა ანრი ოხანაშვილმა.
ინფორმაციისთვის: ფრაქცია ,,ქართული ოცნების“ თავმჯდომარე მამუკა მდინარაძე ტელეკომპანია ,,იმედის“ ეთერში, გადაცემაში ,,იმედი live” საუბრობს საქართველოს მოქალაქეების უკრაინის ომში წაყვანის ორგანიზების საკითხზე:
,,მართლაც არსებობენ ადამიანები, რომლებსაც ღრმად სწამთ, რომ ისინი თავისი სამშობლოსთვის და ამავდროულად თავისუფლებისთვის იბრძვიან. უდიდესი პატივისცემა იმ ადამიანებს.
ამის მიღმა არსებობენ ადამიანები, რომლებიც მართლაც ცდილობენ, რომ წაიყვანონ, რაც შეიძლება მეტი მოქალაქე წინა ფრონტზე.
ის ხალხი, რომელიც სარგებლობს ვიღაც ადამიანის გულწრფელი მოტივებით ერთის მხრივ და მეორე მხრივ – გაჭირვებით, ვინც ამას აორგანიზებს კონკრეტულ თანხას სთავაზობს, ან ენთუზიაზმთან დაკავშირებულ სამოტივაციო წინადადებებს ეუბნება და მიჰყავს, მე იმ ხალხზე მაქვს საუბარი“, – განაცხადა მამუკა მდინარაძემ.
მამუკა მდინარაძემ პარლამენტში გამართულ ბრიფინგზე ასევე განაცხადა, რომ “[უკრაინაში საომრად წამსვლელებს] არ უნმარტავენ კანონის ნორმას, რომლის თანახმადაც საქართველოს მოქალაქე, თუ სხვა ქვეყნის სამხედრო ძალებში ჩაირიცხება, ის კარგავს საქართველოს მოქალაქეობას“.
ავტორი
ნინი ხიჯაკაძე
