კლინიკა “ვივამედში” საქართველოს მე-3 პრეზიდენტის, მიხეილ სააკაშვილის მოსანახულებლად სახალხო დამცველი და კონსილიუმის ექიმები მივიდნენ. ჟურნალისტებთან კომენტარში, ნინო ლომჯარიამ სასამართლო პროცესში ომბუდსმენის ჩართვის საკითხთან დაკავშირებით ისაუბრა:
“სასამართლოში არის წარდგენილი შუამდგომლობა მისი სასჯელის მოხდისგან გათავისუფლების თუ გადავადების თაობაზე და სახალხო დამცველი განიხილავს ამ პროცესში ინტერვენციას.
იმისთვის, რომ ჩვენი პოზიციის წარდგენა შევძლოთ ან გვქონდეს პოზიცია ამ საკითხთან დაკავშირებით საჭიროდ ჩავთვალე, რომ [ექიმთა კონსილიუმთან ერთად] შევხვედროდით და [სასამართლოში] ეს შეიძლება იყოს მეგობრის სტატუსი ან სხვა ფორმით.
თუ არ ვცდები, შემდეგ კვირაში ჩაინიშნა პროცესი, ამიტომ, სავარაუდოდ, მანამდე მოგვიწევს მომზადება, ამიტომ საჭირო გახდა თავად ექიმების მოსვლა, რომ მდგომარეობა თავისი თვალით ენახათ და შეეფასებინათ.
თუ რამის გაკეთება შეგვიძლია მიხეილ სააკაშვილის უფლებების დასაცავად და მისი სიცოცხლის გადასარჩენად, რაზეც დღესაც ჩემი ექიმები საუბრობენ, რომ სიტუაცია ნამდვილად არის რთული, მძიმე და რამდენიმე თვეში კრიტიკული იქნება, ამ დინამიკით, რა თქმა უნდა, ამ მიმართულებით სახალხო დამცველის აპარატი მაქსიმუმს გააკეთებს“, – აცხადებს ნინო ლომჯარია.