ნიკა გვარამიას შეწყალების საკითხის დასაყენებლად, საქართველოს პრეზიდენტთან შეხვედრაზე უარს აცხადებს “სტრატეგია აღმაშენებელი”. როგორც პარტიის ლიდერი, გიორგი ვაშაძე განმარტავს, ამ შეხვედრას აზრი არ აქვს, ცრუ ილუზიებია, რადგან სალომე ზურაბიშვილს ისედაც შეეძლო და უნდა შეეწყალებინა ნიკა გვარამია და მიხეილ სააკაშვილი. ოპოზიციონერი ლიდერის აზრით, პრეზიდენტი დამოუკიდებლად ამ საკითხს ვერ გადაწყვეტს:
„სტრატეგია აღმაშენებელი“ პრეზიდენტთან არანაირ შეხვედრაში მონაწილეობას არ აპირებს, მგონია, რომ ესეც არის ფარსი.
სანამ ჩვენ ყველა თვალს არ გავუსწორებთ რეალობას, რომ სალომე ზურაბიშვილი ერთი დამატებითი ჭანჭიკია ოლიგარქიული რეჟიმის, რომელიც ქვეყანაშია და სანამ ცრუ ილუზიებს, საზოგადოებაში რომელსაც ვქმნით ან ქმნიან, ხოლმე, ამას არ დავასრულებთ, მანამდე არაფერი არ მოხდება.
ამიტომ ზურაბიშვილთან შეხვედრაზე ჩვენ არ ვიქნებით, მასთან ამ თემაზე სალაპარაკო არაფერი მაქვს, რადგან დღესავით ნათელია, რომ მას აქამდეც უნდა გამოეყენებინა, უფრო მეტსაც ვიტყვი – შეწყალების მექანიზმი უნდა გამოიყენოს როგორც გვარამიას, ასევე სააკაშვილთან მიმართებაში. ამ კონკრეტულ შემთხვევაში, ესაა ჩვენი ცალსახა პოზიცია,” – აცხადებს გიორგი ვაშაძე.