“ადგილობრივი ხელისუფლება მხოლოდ იმითაა დაინტერესებული და დაკავებული, თუ როგორ ამოივსონ ჯიბეები ხალხისგან მოპარული ფულით” – ზაზა ვანაძე

ხულოს მუნიციპალიტეტის საკრებულოს წევრმა, პარტია “სტრატეგია აღმაშენებლის” რაიონული ორგანიზაციის ხელმძღვანელმა ზაზა ვანაძემ სააგენტო “პარალელთან” ინტერვიუში რაიონში არსებული პრობლემების შესახებ ისაუბრა და ადგილობრივი თვითმმართველობა, მმართველი პარტია უყურადღებობაში დაადანაშაულა:

“მოგესალმებით, მე მინდა ვისაუბრო იმ პრობლემებზე, რაც რეალურად აწუხებს არამარტო ხულოს, არამედ მთელ ქვეყანას.

დღეს ყველაზე დიდი პრობლემა არის უმუშევრობა, რამაც, სამწუხაროდ, ხულოს რაიონი და სოფლები დააცარიელა მოსახლეობისგან. დღეს, სამწუხაროდ, ახალგაზრდობა და არამარტო ახალგაზრდობა, ვისაც შეუძლია შრომა, ყველა საზღვარგარეთ გარბის.

ჩვენს რაიონს, ხულოს აქვს ტურიზმის მიმართულებით დიდი პოტენციალი რომ განვითარდეს და ადგილობრივი მოსახლეობა, განსაკუთრებით ახალგაზრდობა დავასაქმოთ, თუმცა სამწუხაროდ ამას ადგილობრივი ხელისუფლება არ უწყობს ხელს.

მინდა გითხრათ, რომ ხულოს რაიონში სოფლის მეურნეობის მიმართულებითაც შეიძლება გავაძლიეროთ სოფლები და ადმინისტრაციული ერთეულები. აქვე შევქმნათ სამუშაო ადგილები, შრომაშემძლე და ჯანმრთელი, ძლიერი საზოგადოება შევინარჩუნოთ, გავაძლიეროთ ადგილობრივი მეურნეობა. სამწუხაროდ, რაიონის ხელისუფლება, ამ მიმართულებითაც არ მუშაობს, მხოლოდ იმაზეა ორიენტირებული, რომ ადგილობრივ ჩინოვნიკების ოჯახის წევრებს რაც შეილება ბევრი ტენდერები მიცეს და ხალხის ფულები უშედეგოდ ხარჯონ, შედეგად კი ვერცერთი სოფელი ვერ განვითარდება.

“ქართული ოცნების” მმართველობის პერიოდში, ადგილობრივი ხელისუფლება მხოლოდ იმითაა დაინტერესებული და დაკავებული, თუ როგორ ამოივსონ ჯიბეები ხალხისგან მოპარული ფულით,” – აცხადებს ზაზა ვანაძე.