“საუბარი მერის პოლიტიკურ პასუხისმგებლობაზე, არის ცარიელი სპეკულაცია და აბსოლუტურად უადგილო” – ირაკლი კობახიძე

პარტია ,,ქართული ოცნების” თავმჯდომარე ირაკლი კობახიძე პარლამენტში ჟურნალისტებთან შეფასებას აკეთებს თბილისის მერის, კახა კალაძის პოლიტიკური პასუხისმგებლობის აღებაზე ვაკის პარკში დატრიალებულ ტრაგედიასთან დაკავშირებით:

,,ზოგადად პოლიტიკური პასუხისმგებლობის საკითხი შეიძლება დადგეს იმ შემთხვევაში, თუ უწყებაში ვლინდება რაიმე სისტემური პრობლემა. ამ შემთხვევაში ჩვენ გვაქვს რადიკალურად განსხვავებული სურათი. ამ 5 წლის განმავლობაში კახი კალაძის ხელმძღვანელობით თბილისის მერიაში განხორციელდა ათასობით პროექტი. ეს პროექტები იყო გამორჩეული სწორედ მაღალი ხარისხით ყველა თვალსაზრისით – როგორც ვიზუალური, ისე ტექნიკური.

აქედან გამომდინარე, არა თუ სისტემური პრობლემა არ არსებობს, პირიქით – სისტემურად პროექტები ხორციელდება წარმატებით. ამ შემთხვევაში იყო კონკრეტული გადაცდომა, გულგრილობა, რამაც გამოიწვია ტრაგიკული შედეგი.
თუმცა, რაც შეეხება სისტემურ პრობლემას – არ ვლინდება.

ასეთ პირობებში საუბარი მერის პოლიტიკურ პასუხისმგებლობაზე, არის ცარიელი სპეკულაცია და აბსოლუტურად უადგილო“, – განაცხადა ირაკლი კობახიძემ.

ავტორი
ნინი ხიჯაკაძე