ბერლინში ევროპელი სოციალ-დემოკრატების ყრილობა გაიმართა, რომელსაც ,,ქართული ოცნების“ ლიდერები ესწრებდონენ. ყრილობის დასრულების შემდეგ ჟურნალისტებთან პოზიტიურ მოლოდინებზე კომენტარი გააკეთა მმართველი პარტიის თავმჯდომარემ ირაკლი კობახიძემ:
,,იყო ძალიან პოზიტიური გზავნილები საქართველოსთან დაკავშირებით. ეს გზავნილები გაჟღერდა არაერთი პოლიტიკური ლიდერის მხრიდან.
ყველა საუბრობდა იმასთან დაკავშირებით, რომ საჭიროა ევროპის/ევროკავშირის გაფართოება და ამ კონტექსტში პირდაპირ იყო მოხსენებული საქართველო.
ეს პოლიტიკური მხარდაჭერა არის, ბუნებრივია, ჩვენთვის ძალიან მნიშვნელოვანი და რა თქმა უნდა, აგვავსებს ოპტიმიზმით იმასთან დაკავშირებით, რომ საქართველო მალე მიიღებს კანდიდატის სტატუსს, შემდეგ გახდება ევროკავშირის წევრი ქვეყანა.
განცხადება იმასთან დაკავშირებით, რომ ევროპა უნდა გაფართოვდეს ლისაბონიდან თბილისამდე არის, რა თქმა უნდა, განსაკუთრებით მნიშნელოვანი. გერმანიას აქვს განსაკუთრებული როლი ევროინტეგრაციის მიმართულებით, შესაბამისი გადაწყვეტილებების მიღების კუთხით. აქედან გამომდინარე, შოლცის ეს გზავნილი იყო ჩვენთვის განსაკუთრებით სასიამოვნო და საინტერესო.
ჩვენი პოლიტიკური პარტნიორების განწყობა აისახა პირდაპირ დოკუმენტში. რეზოლუციაში, რომელიც მიღებულ იქნა ამ ყრილობის მიერ და პირდაპირ ხაზგასმულია ის, რომ ეს პოლიტიკური ოჯახი მხარს უჭერს საქართველოსთვის კანდიდატის სტატუსის მინიჭებას“, – განაცხადა ირაკლი კობახიძემ.
ინფორმაციისთვის: ბერლინში სოციალ-დემოკრატების ყრილობაზე სიტყვით გამოსვლის დროს, გერმანიის კანცლერმა, ოლაფ შოლციმ ისაუბრა ევროკავშირის გაფართოების პერსპექტივაზე:
,,დღეს, როდესაც რუსეთი ცდილობს ძალისმიერი გზით შეცვალოს საზღვრები თავისუფლებასა და ავტოკრატიას შორის, ჩვენ ვართ ევროპის ხალხი, ჩვენი ხმა მთელ ევროპაში უნდა ისმოდეს – ხმელთაშუადან ჩრდილოეთის ზღვამდე, ლისაბონიდან – თბილისამდე და ამის მიღმა! ერთად ჩვენ საფუძველი უნდა ჩავუყაროთ თავისუფალ, უსაფრთხო და დემოკრატიულ ევროპას!“, – განაცხადა ოლაფ შოლციმ.
ავტორი
ნინი ხიჯაკაძე
