ვარშავაში სამუშაო ვიზიტის ფარგლებში, საგარეო ურთიერთობათა კომიტეტის თავმჯდომარე, ნიკოლოზ სამხარაძე სიტყვით გამოვიდა პანელზე, რომელიც საქართველოს და უკრაინას მიეძღვნა.
პანელზე მონაწილეებმა განიხილეს უკრაინაში მიმდინარე ომი, მისი გავლენა საქართველოსა და მთლიანად შავი ზღვის რეგიონზე, ნატო-ს მნიშვნელობა საქართველოსთვის და უკრაინისთვის, ევროკავშირის კანდიდატის სტატუსი, ევროპის მომავალი უსაფრთხოების არქიტექტურა, აღმოსავლეთ პარტნიორობა და სხვა მნიშვნელოვანი საკითხები.
სიტყვით გამოსვლისას, ნიკოლოზ სამხარაძემ ყურადღება გაამახვილა ევროკავშირის 12 რეკომენდაციაზე და განაცხადა, რომ ყველა რეკომენდაცია შესრულდება მიმდინარე წლის დეკემბრის ბოლომდე.
ასევე, მან ყურადღება გაამახვილა აღმოსავლეთ პარტნიორობის ფორმატის გადახედვის მნიშვნელობაზე, ნატო-ს როლზე საქართველოს უსაფრთხოების განსამტკიცებლად და იმედი გამოთქვა, რომ მომავალ წელს საქართველოს ევროკავშირი დამსახურებულად მიანიჭებს ევროკავშირის კანდიდატის სტატუსს.
„დღევანდელ რეალობაში საქართველო იმყოფება ძალიან რთულ ვითარებაში. ქვეყნის წინაშე დგას ისეთი საფრთხე, როგორიც არის რუსეთის ფედერაცია. უკრაინაში მიმდინარე რუსული აგრესია, რაც წარმოადგენს 2008 წელს საქართველოში განხორციელებული აგრესიული პოლიტიკის გაგრძელებას, ნათლად ასახავს, რომ ნებისმიერ დროს საქართველო კვლავ შეიძლება ანალოგიურ სიტუაციაში აღმოჩნდეს.
ერთადერთი გზა ჩვენი ქვეყნის უსაფრთხოებისთვის გადის ნატო-სა და ევროკავშირზე. სამწუხაროდ, საქართველოს პროგრესი სათანადოდ არ იქნა შეფასებული, თუმცა იმედი მაქვს, რომ წლის ბოლოს, როდესაც საქართველო შეასრულებს ევროკავშირის 12 რეკომენდაციას, ევროკავშირი მიიღებს პრაგმატულ, სამართლიან და ობიექტურ გადაწყვეტილებას და საბოლოოდ მიანიჭებს საქართველოს კანდიდატის სტატუსს“, – განაცხადა ნიკოლოზ სამხარაძემ.
ინფორმაციას პარლამენტის საზოგადოებასთან ურთიერთობისა და ინფორმაციის დეპარტამენტი ავრცელებს
