საქართველოს მთავრობის განკარგულებით უკრაინელ ლტოლვილებს დაფინანსება შეუჩერდათ, რადგანაც დახმარების რამდენიმე თვიან პროგრამას ვადა ამოეწურა. აღნიშნულთან დაკავშირებით საგანგებო ბრიფინგი ჩაატარა პარტია ,,დროას“ თავმჯდომარემ ელენე ხოშტარიამ. ოპოზიცონერი ლიდერი მოუწოდებს საზოგადოებას, რომ მიიღონ მონაწილეობა საქართველოში მყოფი უკრაინელების დასახმარებლად:
,,ამ წუთებში, როდესაც უკრაინაში რუსეთი აგრძელებს კაცობრიობის წინაშე დანაშაულის ჩადენას, ხალხის წამებას, მკვლელობას, სამხედრო დანაშაულების ჩადენას. იქიდან ადამიანები იძულებით მოდიან საქართველოში, ჩვენმა ხელისუფლებამ დღეს გამოაგდო ადამიანები პირდაპირ სასტუმროებიდან და სახლებიდან. რამდენიმე თვიანი პროგრამა დასრულდა, სადაც ადამიანებს შეეძლოთ უბრალოდ ეცხოვრათ და ეკვებათ.
ეს არის გაუგონარი, მტრული ნაბიჯი ომის პირობებში! ეს არის მტრული და პრორუსული ნაბიჯი ჩვენი ხელისუფლების მხრიდან! ეს არის ჩვენი ქვეყნის სირცხვილი!
ამასთანავე მე არ ვაპირებ, ხელისუფლებისთვის რაიმეს მოთხოვნას. მე მოვუწოდებ საზოგადოებას, ბიზნესებს და ხალხს, რომელთაც შეუძლიათ, რომ სირცხვილი მოწმინდონ ჩვენს ქვეყანას – გვერდში დავუდგეთ ქუჩაში დარჩენილ უკრაინელებს!
მე მინდა, მივმართო ყველას – ჩვენ გვესმის როგორი ხელისუფლება გვყავს, მაგრამ მოვეშვათ წუწუნს და ვიმოქმედოთ. მოქმედება იქნება იმაში, რომ ყველამ ჩვენი წვლილი შევიტანოთ, თითო თეთრი, საკვები, ბინა, სასტუმრო. ნებისმიერი რამის გაზიარება დღეს იქნება ამ ადამაინებისთვის გვერდში დგომა.
ჩვენ სრული პასუხისმგებლობით ვაცხადებთ, არცერთ უკრაინელს არ დავტოვებთ ქუჩაში! მოგიწოდებთ, რომ თქვენც მიიღოთ ამ ყველაფერში მონაწილეობა“, – განაცხადა ელენე ხოშტარიამ.
ავტორი
ნინი ხიჯაკაძე
