მუსიკოსმა, მომღერალმა, მედიაში სხვადასხვა პროექტის ავტორმა გიორგი გაჩეჩილაძემ (უცნობმა) გაასაჯაროვა აუდიო ჩანაწერები, სადაც ,,მთავარი არხის“ გადაცემა ,,Post Factum”- ის ჟურნალისტების და პროდიუსერის მიერ სამუშაოთა დაგეგმვის პროცესია ჩაწერილი. ფარულ მიყურადებაზე მწვავე განცხადება გააკეთა ადვოკატმა დიმიტრი საძაგლიშილმა:
,,მე თითქმის დარწმუნებული ვარ, რომ ეს არის სახელმწიფო უსაფრთხოების სამსახურის მიერ უკანონო მოსმენის შედეგად მოპოვებული ჩანაწერი, რომელიც მერე გაავრცელებინეს მის წარმომადგენელს.
ეს არ არის პირველი შემთხვევა. იმიტომ, რომ არაერთხელ ყოფილა რაღაც გაუგებარი წყაროების მხრიდან ვითომ ასე შემთხვევით მოპოვებული ჩანაწერების გავრცელება, რაზეც საქართველოს ხელისუფლების, შესაბამის საგამოძიებო ორგანოებს რეაგირება არასოდეს არ მოუხდენიათ.
ბუნებრივია, როდესაც დამკვეთი არის ხელისუფლება უკანონო თვალთვალის და მოსმენის, ამის შემდეგ საგამოძიებო ორგანოები, ცხადია, არაფერს აკეთებენ. იმიტომ, რომ პროკურატურაც ამ შემთხვევაში არის ისეთივე დანაშაულებრივი სისტემის შემადგენელი ნაწილი, როგორც სახელმწიფო უსაფრთხოების სამსახური.
უბრალოდ ეს არის ახალ ეტაპზე გადასვლა. იმიტომ, რომ ჟურნალისტების თათბირის ჩაწერა და მერე გავრცელება აქამდე არ გვქონია. სამწუხაროდ, არ მაქვს ოპტიმისტური მოლოდინი, რომ ამას რაიმე შედეგი შეიძლება მოჰყვეს.
ეს არის კიდევ ერთხელ დემონსტრირება, რომ საქართველოს არ ადარდებს, მათ შორის ევროკავშირის მიერ დადგენილი რეკომენდაციები იმიტომ, რომ ჩვენი დასავლელი პარტნიორები თუ რამეს ითხოვენ, ერთ-ერთი პირველი არის მედიის თავისუფლება და მედიაზე ზეწოლისგან თავის შეკავება. მაშინ, როცა ამ პირობებშიც კი ვხედავთ, რომ ხელისუფლება დაკავებულია კრიტიკული მედიასაშუალებების დევნით, ახლა უკვე ფარული ჩანაწერების მოპოვებით და გავრცელებით“, – განაცხადა დიტო საძაგლიშვილმა.
ავტორი
ნინი ხიჯაკაძე
