“მიხეილ სააკაშვილთან დაკავშირებულ ნებისმიერ საკითხს წყვეტს არა სასამართლო, არამედ ბიძინა ივანიშვილი და მისდამი დაქვემდებარებული “ქართული ოცნება” – ბექა ბასილაია

კონსილიუმის წევრი ექიმები საქართველოს მე-3 პრეზიდენტთან კლინიკა ,,ვივამედში“ იმყოფებოდნენ და ექსპერტიზის შემაჯამებელი დასკვნის შესადგენად საბოლოო გამოკვლევა ჩაატარეს. აღნიშნულ საკითხზე ჟურნალისტებთან კომენტარი გააკეთes მიხეილ სააკაშვილის ადვოკატმა ბექა ბასილაიამ და წამების მსხვერპლთა ფსიქოლოგიური რეაბილიტაციის ცენტრ ,,ემპათიას“ დირექტორმა მარიამ ჯიშკარიანმა:

,,მიხეილ სააკაშვილთან დაკავშირებულ ნებისმიერ საკითხს წყვეტს არა სასამართლო, არამედ ბიძინა ივანიშვილი და მისდამი დაქვემდებარებული ,,ქართული ოცნება“.

მიხეილ სააკაშვილის საქმეები არის შეთითხნილი, პოლიტიკურად მოტივირებული, ყოველგვარ მტკიცებულებებს მოკლებული და ხშირ შემთხვევაში არაკონსტიტუციური.

ამის მიუხედავად მიხეილ სააკაშვილი იმყოფება პოლიტიკურ ტყვეობაში. შესაბამისად, პოლიტიკური ნება არის მთავარი მდგენელი მის საქმეებზე გადაწყვეტილებების მიღებისას“, – განაცხადა ბექა ბასილაიამ.

მიხეილ სააკაშვილის ჯანმრთელობის მდგომარეობასთან დაკავშირებით მარიამ ჯიშკარიანმა განაცხადა, რომ ,,პროგრესი არსებითი და მნიშვნელოვანი არ არის“:

,,დღეს გავეცანით პრაქტიკულად სამედიცინო დოკუმენტაციას, გარკვეული გამოკვლევების შედეგებს. ასევე გასაუბრება გვქონდა ექიმებთან.

ხვალ იგეგმება პაციენტის გასინჯვა.

მე ვფიქრობ, რომ პროგრესი არსებითი და მნიშვნელოვანი არ არის. ჩვენი მოსაზრებით, რა თქმა უნდა, იგი კვლავ საჭიროებს სპეციალიზირებულ სამკურნალო სარეაბილიტაციო ცენტრში მკურნალობას და რეაბილიტაციას“, – განაცხადა მარიამ ჯიშკარიანმა.

ავტორი
ნინი ხიჯაკაძე