“ნაციონალური მოძრაობის” ყოფილი წევრი, მიხეილ სააკაშვილის აქტიური მხარდამჭერი, მაია ორჯონიკიძე სოციალურ ქსელში საქართველოში არსებული პოლიტიკური სიტუაციის შეფასებას ახდენს და კონკრეტულ მოსაზრებებს წარმოადგენს ხელისუფლების ცვლილებასთან დაკავშირებით:
“არაპოპულარული თემაა, მაგრამ ჩვენი პრობლემის ძირის ძირი ისაა, რომ არც პოლიტიკური პარტიების და არც საზოგადოებრივი ჯგუფების ლიდერები მზად არ არიან თავისუფლებაში საფასური გადაიხადონ იმ დროს, როცა ხალხის დიდი მასა მზადაა რეჟიმს ფიზიკური წინააღმდეგობა გაუწიოს.
წარმოიდგინეთ, 2014 წელს უკრაინელების ტაქტიკა რომ იგივე ყოფილიყო, რაც ჩვენთან დამკვიდრდა – გაიმარჯვებდნენ?
ცხადია არა, რადგან რუსულ რეჟიმს მხოლოდ უსასრულო სადღეგრძელოებით სახლში ვერ გაუშვებ.
უკრაინელები მზად იყვნენ თავისუფლებისთვის ნებისმიერი საშუალებით ებრძოლათ, ნებისმიერი ფასი გადაეხადათ და სწორედ ამიტომ გაიმარჯვა მაიდანმაც და გაიქცა იანუკოვიჩიც.
ჩვენ კი ქვეყნის ნელი კვდომა და ლპობა გვირჩევნია, ოღონდაც ხელი არ შევუბრუნოთ პუტინის მკვლელ, ანტისახელმწიფოებრივ რეჟიმს. ტაბლეტებითა და თერაპიით ვცდილობთ ვუმკურნალოთ განგრენას, რომელსაც მხოლოდ ქირურგია და სკალპელი შველის. მაგრამ სკალპელის გაგონებზე ყველას აკანკალებს – ლიდერებსაც და მედიასაც, საზოგადოებრივ ელიტებს შორის დაუწერელი კონსენსუსი არსებობს იმაზე, რომ მთლიანად რეპრესიულ აპარატზე მდგომი რეჟიმი ძალაუფლებას უბრძოლველად დათმობს.
ჰოდა კი ლპება და იძირება ამ ფუჭი ჰაერის ზანზარსა და უსასრულო ლაყბობაში საქართველო – ქვეყანაში არავინაა, ვინც ნამდვილ პასუხისმგებლობას აიღებს ქვეყნის გათავისუფლებაზე…
თან თავისუფლება გინდოდეს და თან რეჟიმისთვის ხელის შებრუნების გეშინოდეს – არ გამოდის!
ის,რაც ჭრიდა შევარდნაძესთან – არ ჭრის ლუკაშენკოსა და ივანაშვილის მაგვარ რუსულ რეჟიმებთან. მოძალადე რეჟიმი მხოლოდ მაშინ დაიხევს უკან, როცა თავადაც ძალას დაინახავს, რომ ბრძოლა იქნება თავგანწირული და ბრძოლა იქნება გამარჯვებამდე!
აქსიომაა და ისტორიამ დაამტკიცა: თავისუფლება საფასურის გარეშე არ მოდის“, – წერს ფეისბუქის პირად გვერდზე მაია ორჯონიკიძე.
