3 ივლისის საპროტესტო აქციის ფონზე, პარლამენტის რეგიონული პოლიტიკისა და თვითმმართველობის კომიტეტის თავმჯდომარის პირველი მოადგილე, ირაკლი ზარქუა “ქართული ოცნების” თავმჯდომარის, ირაკლი კობახიძის მიერ წარმოდგენილ 12-პუნქტიან გეგმაზე საუბრობს და მის შესრულებასთან დაკავშირებით კონკრეტული იმედებიც აქვს:
“ირაკლი კობახიძემ კონკრეტული გეგმა წარმოადგინა, რომლის მიხედვითაც ჩვენ ვიმუშავებთ, მათ შორის, ჩართულები იქნებიან საპარლამენტო ოპოზიცია, ვინც კონსტრუქციულად ქვეყნის ხვალინდელ დღეზე ფიქრობს და ნამდვილად ბევრია პარტია ვინც ამაზე ფიქრობს, მათ შორის, არასამთავრობო ორგანიზაციები, ექსპერტები, ჩვენ ყველა ჩავერთვებით, რომ წლის ბოლომდე კი არა, მანამდეც, რეფორმები ბოლომდე მივიყვანოთ და პირნათლად წარვდგეთ ევროკომისიის წინაშე.
მე დარწმუნებული ვარ ევროკომისია ჩვენ მოგვანიჭებს კანდიდატის სტატუსს იმიტომ, რომ ჩვენი მხრიდან ეს გაკეთებული იქნება თავიდან ბოლომდე. ჩვენ ისედაც, ევროპასთან და ბრიუსელთან გვქონდა მემორანდუმი, სადაც აღბეჭდილი იყო გარკვეული ნაწილი, დაახლოებით 70%, ისედაც პროცესში ვართ, ამას ისედაც ვასრულებდით.
აქედან გამომდინარე, ის ხელმოცარულები “ნაციონალური მოძრაობიდან”, რომლებიც დღეს საზოგადოებას ეპატიჟებიან, ისევ დარჩებიან ხელმოცარულად, როგორც აქამდე არაერთი აქცია გვინახავს,” – განაცხადა ირაკლი ზარქუამ.
