“სტრატეგია აღმაშენებლის” ლიდერი გიორგი ვაშაძე, ბრიუსელში ევროპარლამენტარ ანა ფოტიგას შეხვდა. ვაშაძის თქმით შეხვედრაზე ფოტიგა გაეცნო ეროვნული თანხმობის მთავრობის ინიციატივას. ასევე ოპოზიციონერი ლიდერი აცხადებს, რომ “სტრატეგია აღმაშენებლის” აქტიური მუშაობის შედეგად მოპოვებულია ევროპარლამენტარების მხარდაჭერა, რომელსაც საზოგადოება უახლოვეს მომავალში ნათლად დაინახავს:
“შევხვდით ევროპარლამენტარ ანა ფოტიგას, რომელსაც გავაცანით ეროვნული თანხმობის მთავრობის ინიციატივა. მისი მხრიდან, გაცნობილ ინიციატივასთან დაკავშირებით, პოზიტიური განწყობაა. ვისაუბრეთ საქართველოში შექმნილ ვითარებაზე, ასევე სანქციებთან დაკავშირებით. საუბარი გვქონდა, როგორც საქართველოსთან ასევე უკრაინასთან დაკავშირებით.
შევეხეთ რუსთაველზე გამართულ აქციებს და ამ აქციების მიზნებთან დაკავშირებით ვიმსჯელეთ, ევროპარლამენტარი ანა ფოტიგა აბსოლუტურად სრულ მხარდაჭერას უცხადებს ამ აქციებს და ქართველი ხალხის მისწრაფებას, რომელთა სურვილი ევროპული ოჯახის წევრობაა.
ვაგრძელებთ მუშაობას ევროპარლამენტარებთან, ჩვენი აქტიური მუშაობის შედეგად მოვიპოვეთ ევროპარლამენტარების მხარდაჭერა, რომელსაც საზოგადოება უახლოვეს მომავალში ნათლად დაინახავს“,- აცხადებს გიორგი ვაშაძე.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს