“მარტივი გამოსავალია – გადადგეს ღარიბაშვილი, შეიქმნას ეროვნული თანხმობის მთავრობა“ – პაატა მანჯგალაძე

საქართველოს პარლამენტის წევრი პაატა მანჯგალაძე ეთანხმება ახალი სახალხო მოძრაობის მოთხოვნებს, რომელიც გაჟღერდა 24 ივლისს პარლამენტის წინ გამართულ აქციაზე. ოპოზიციონერი ლიდერი აცხადებს, რომ ამ ინიციატივას მხარს უჭერს პარტია ,,სტრატეგია აღმაშენებელი“:

,,ეს არის ფართო კონსესუსით შეჯერებული მოთხოვნები. ეს არის ის, რაც იქ დამსწრე, აქციაში მონაწილე საზოგადოებას უნდა, რომ საქართველო გახდეს ევროპის ნაწილი.

ევროპის საბჭომ იმისთვის, რომ ჩვენ გავხდეთ ევროპის ნაწილი, შემოგვთავაზა 12 პუნქტიანი გეგმა, თუმცა საქართველოში, სამწუხაროდ, არავის არ გვჯერა, რომ ხელისუფლება ამას თავისი ნებით გააკეთებს.

ამიტომ მარტივი გამოსავალია გადადგეს ღარიბაშვილი, შეიქმნას ეროვნული თანხმობის მთავრობა – “დროებითი მთავრობა” დავარქვათ ან გარდამავალი მთავრობა, თუნდაც, რომელიც იანვრამდე უზრუნველყოფს ყველა რეკომენდაციის შესრულებას.

ეს არის ქართველი ერის, საქართველოს მოქალაქეების დაკვეთა. რა თქმა უნდა, ,,სტრატეგია აღმაშენებელი“ უჭერს მხარს ამ მოთხოვნებს“, – განაცხადა პაატა მანჯგალაძემ.

ავტორი
ნინი ხიჯაკაძე