პარლამენტის წევრი სალომე სამადაშვილი ჟურნალისტებთან კომენტარს აკეთებს და აცხადებს, რომ სასამართლოში სარჩელს შეიტანს პრემიერ-მინისტრის ირაკლი ღარიბაშვილისა და ,,ქართული ოცნების“ თავმჯდომარის ირაკლი კობახიძის წინააღმდეგ:
,,ირაკლი ღარიბაშვილის პერსონალურმა თავდასხმამ ჩემზე გამოიწვია საკმაოდ დიდი საერთაშორისო რეზონანსი. თქვენ ნახეთ, რომ ევროპარლამენტარები იმავე დღეს გამოეხმაურნენ მას. დამიკავშირდნენ სხვად სხვა ქვეყნის საელჩოები ჩვენს ქვეყანაში. იმიტომ, რომ მათ მიაჩნიათ მსგავსი მოწოდება – ეს არის მოწოდება ძალადობისკენ რეალურად!
მე, სიმართლე რომ გითხრათ, არ ვფიქრობდი სარჩელის შეტანას. იმიტომ, რომ არ მაქვს, ცხადია, არანაირი მოლოდინი, რომ ივანიშვილის სასამართლო რაიმე გადაწყვეტილებას მიიღებს სამართლის მიხედვით, მაგრამ ეს იყო რჩევა ჩვენი უცხოელი პარტნიორების, რომ მაინც იქნებოდა სწორი, რომ მე შესაბამისი სამართლებრივი გზით ვიმოქმედო ამ შემთხვევაში.
განსაკუთრებით მაშინ, როდესაც კობახიძემ, მმართელი პარტიის თავმჯდომარემ, დღეს კიდევ ერთხელ გაიმეორა ის ცილისწამება – მე გადავწყვიტე, რომ გავითვალისწინო ეს რჩევა. შესაბამისად, შევიტან უკვე მომავალ კვირას ოფიციალურად ცილისწამებისთვის სარჩელს სასამართლოში“, – განაცხადა სალომე სამადაშვილმა.
შეგახსენებთ, რომ საქართველოს პრემიერ-მინისტრმა ირაკლი ღარიბაშვილმა მთვარობის ანგარიშის წარდგენის დროს პარტია ,,ლელოს“ წევრს სალომე სამადაშვილს ქვეყნის მოღალატე უწოდა და აცხადებდა, რომ ოპოზიციონერი ლიდერი ბრიუსელში ვიზიტის დროს ევროპელ პარტნიორებთან აწარმოებდა მოლაპარაკებას საქართველოსთვის კანდიდატის სტატუსის არმინიჭების თაობაზე. ანალოგიური განცხადება გაავრცელა მოგვიანებით ,,ქართული ოცნების“ თავმჯდომარემ ირაკლი კობახიძემ პარტიის ოფისში გამართულ ბრიფინგზე.
ავტორი
ნინი ხიჯაკაძე
