10 ივნისს თბილისის სახელმწიფო უნივერსიტეტში განვითარებულ მოვლენებს, რა დროსაც დაპირისპირება მოხდა სტუდენტებსა და უნივერსიტეტის თანამშრომლებს შორის, სპეციალური განცხადებით ეხმაურება განათლების სამინისტრო:
“საქართველოს განათლებისა და მეცნიერების სამინისტრო ეხმიანება ივანე ჯავახიშვილის სახელობის თბილისის სახელმწიფო უნივერსიტეტში 10 ივნისს განვითარებულ მოვლენებს.
სამინისტროსთვის მიუღებელია ყოველგვარი ძალადობრივი ქმედება და შესაბამისად, გმობს პროტესტის გამოხატვის იმ ძალადობრივ ფორმებს, რომელსაც ადგილი ჰქონდა 10 ივნისს თბილისის სახელმწიფო უნივერსიტეტში.
სამინისტრო პატივს სცემს თითოეული სტუდენტის გამოხატვის თავისუფლებას, თუმცა პროტესტის ძალადობრივი ფორმა დაუშვებელია.
იმედს გამოვთქვამთ, რომ ყველა გამოწვევის დაძლევა აკადემიური სასწავლო სივრცისა და საუნივერსიტეტო საზოგადოებისთვის შესაბამის ფორმატში მოხდება“, – ნათქვამია განცხადებაში.
ინფორმაციისთვის: რამდენიმე კვირის განმავლობაში სტუდენტები პროტესტს გამოხატავდნენ და უნივერსიტეტის ხელმძღვანელობისგან რამდენიმე მოთხოვნის დაკმაყოფილებას მოითხოვდნენ. მათ შორის იყო დისტანციურად გამოცდების ჩაბარების უფლების მოთხოვნა და სტუდენტური საცხოვრებლით სტუდენტების უზრუნველყოფა. 10 ივნისს დაპირისპირება მოხდა უნივერსიტეტის შენობაში, რა დროსაც, თსუ-ს პრესსამსახურის ინფორმაციით, დაცვის 4 თანამშრომელმა დაზიანებები მიიღო.
