საქართველოს პარლამენტის თავმჯდომარე შალვა პაპუაშვილი კრიტიკულ შეფასებას აკეთებს სალომე ზურაბიშვილის განცხადებაზე ნიკა გვარამიას დაპატიმრების საკითხთან დაკავშირებით. მმართველი პარტიის ერთ-ერთ ლიდერს მიაჩნია, რომ პროცედურებთან დაკავშირებით ვერავინ მიუთითებს მართლმსაჯულებას, თუ რა დროს რა გადაწყვეტილება მიიღოს:
,,ჩვენ მოვისმინეთ ეპითეტი, მაგრამ ვერ მოვისმინეთ არგუმენტი. ეს არის მნიშვნელოვანი, როდესაც განსაკუთრებით ასეთი მძიმე ეპითეტებით მოიხსენიება ესა თუ ის კონსტიტუციური ორგანოები, ამას მინიმუმ უნდა მოჰყვეს არგუმენტი.
აქ საკმარისი არ არის, რომ ვიღაცამ გააკრიტიკა, ვიღაცამ ასე თქვა, ვიღაცამ – ისე. აქ მნიშვნელოვანი არგუმენტია.
ჩვენ ვსაუბრობთ კონსტიტუციურ ორგანოზე, როდესაც ერთი კონსტიტუციური ორგანო მეორე კონსტიტუციურ ორგანოს ასეთი ეპითეტით ამკობს.
როდესაც არის ასეთი ტიპის განცხადებები – პირდაპირი ჩარევა ქართულ მართლმსაჯულებაში, რა თქმა უნდა, ჩვენგან ამას კრიტიკული შეფასება მოჰყვება.
რაც შეეხება კონკრეტულად ამ პროცესს – იყო ეს დროული თუ სათანადო დროს არ იყო, აქ მე მგონი ახსნაც კი ზედმეტია იმის, რომ ვერავინ მართლმსაჯულებას ვერ მიუთითებს პროცედურები რა დროში უნდა ჩატარდეს. ეს არის სასამართლოს დამოუკიდებლობის ქვაკუთხედი“, – განაცხადა შალვა პაპუაშვილმა.
ავტორი
ნინი ხიჯაკაძე
