„სტრატეგია აღმაშენებლის“ ინიციატივით და პარლამენტის ოპოზიციონერი დეპუტატების მხარდაჭერით, ხვალ პარლამენტში საპარლამენტო დებატები გაიმართება. ხელისუფლებასა და ოპოზიციას შორის დებატები 17:00 საათზე დაიწყება. გიორგი ვაშაძის თქმით ხვალ „ქართულ ოცნებას“ სამსჯავროზე მოუწევს წარდგენა, რომელიც ევროინტეგრაციის საკითხს შეეხება:
„ხვალ პირველად გაიმართება საპარლამენტო დებატები, რომელიც მიეძღვნება ევროპულ და ევროატლანტიკური ინტეგრაციის გზას, სწორედ იმ საკითხებს, რომლებსაც უკვე ასე ღიად ეწინააღმდეგება „ქართული ოცნება“.
ჩვენი ქართული საზოგადოების მთავარი მიზნის მისაღწევად ყველამ ერთად უნდა გავაგონოთ ხმა ევროპას, რომ ჩვენ ვიმსახურებთ ევროკავშირის წევრობის კანდიდატის სტატუსს მიუხედავად იმისა, რომ ხელისუფლება ძალიან ბევრ ნაბიჯს დგამს ხელის შესაშლელად.
სწორედ ამიტომ, ხვალ სამსჯავროზე წარდგება „ქართული ოცნება“ და ვნახოთ, როგორ გასცემს პასუხს იმ კონკრეტულ კითხვებს, გეგმებს და საკითხებს, რომლებსაც ჩვენ დავსვამთ მათთან მიმართებაში“, – განაცხადა გიორგი ვაშაძემ.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
