,,სტრატეგია აღმაშენებლის“ თავმჯდომარე გიორგი ვაშაძე განცხადებას აკეთებს თბილისის საქალაქო სასამართლოს მიერ ,,მთავარი არხის“ გენერალური დირექტორის ნიკა გვარამიასთვის პატიმრობის განაჩენის გამოტანაზე და მწვავე შეფასებას ახდენს ,,ქართული ოცნების“ პოლიტიკურ ნაბიჯებთან დაკავშირებით:
,,დღეს კიდევ ერთი პოლიტიკური მართლმსაჯულების ფაქტის წინაშე დავდექით. თავიდან ბოლომდე, რა თქმა უნდა, პოლიტიკურად მოტივირებულია ნიკა გვარამიას დაკავების საქმე. ერთი მხრივ ბრალდების, შინაარსის აბსურდულობა; მეორე მხრივ – მაინც და მაინც ახლა დაჩქარება ამ პროცესის უკავშირდება იმ საკითხს, რომ ,,ქართული ოცნება“ მეტ სავაჭრო თემას იტოვებს დასავლელ პარტნიორებთან.
,,ქართულ ოცნებას’’ მოუწევს ძალიან კონკრეტული ნაბიჯების გადადგმა უახლოეს მომავალში. იმიტომ, რომ საზოგადოება დაინახავს, რომ ისინი მთლიანად აცდნენ დასავლური და ევროატლანტიკური ინტეგრაციის გზას.
,,ქართულ ოცნებას“ მოუწევს პასუხები გასცეს როგორც ჩვენ ამერიკელ, ასევე დასავლელ პარტნიორებს, მაგრამ პირველ რიგში, პასუხი გასცეს საქართველოს საზოგადოებას. აი ამ პასუხისმგებლობისთვის ისინი ნელ-ნელა იგროვებენ სავაჭრო საკითხებს, რომელიც, როგორც წესი, მათ უნდათ ხოლმე, რომ შემდგომ რაღაცა დათმონ, მერე ამ დათმობის ხარჯზე ფონს გავიდნენ და ა.შ.
მე ვფიქრობ, დღევანდელი დღე კიდევ ერთხელ მითითებს, რომ ჩვენ ყველა ერთად უნდა დავდგეთ, გავერთიანდეთ და მართლაც ამ გზააცდენილი პროცესიდან ქვეყანა უნდა დავაბრუნოთ დასავლური განვითარების გზაზე.
ჩვენ უნდა ვიყოთ ერთიანები, პრინციპულები. საბოლოო ჯამში, გამარჯვება უნდა მოვიპოვოთ. უახლოეს 2-3 თვეში კიდევ ერთხელ გავიმეორებ ველოდებით ძალიან ბევრ საკითხს, რომელიც დაჩქარდება საქართველოს შიგნითაც და ფარგლებს გარეთ.
დარწმუნებული ვარ, რომ ძალიან მალე ყველა პოლიტპატიმარი იქნება თავისუფალი. რაც მთავარია – საქართველო ნამდვილად დაუბრუნდება დასავლური განვითარების გზას.
დღევანდელი დღე კიდევ ერთი ნათელი მაგალითია საქართველოს თითოეული მოქალაქისთვის პირველ რიგში და მთლიანად მსოფლიოსთვის, რომ საქართველოში დემოკრატია არ არსებობს. საქართველოში არის ,,ფეიკ“ დემოკრატია! ცრუ ილუზიები, ვითომ რაღაც ინსტიტუციები არსებობს, მაგრამ ყველაფერი აბსოლუტურად არის იმ პოლიტიკურ ინტერესზე მორგებული, რაც აქვს ,,ქართულ ოცნებას“.
მალე განთავისუფლდება ნიკა გვარამიაც, ყველა პოლიტპატიმარი და რაც მთავარია მალე საქართველო დაუბრუნდება დასავლური განვითარების გზას. ძალიან მალე ,,ქართულ ოცნებას“ გავისტუმრებთ ხელისუფლებიდან“, – განაცხადა გიორგი ვაშაძემ.
ავტორი
ნინი ხიჯაკაძე
