პარლამენტის ყოფილი თავმჯდომარე, კახა კუჭავა ევროპის დღისადმი მიძღვნილ პოსტს აქვეყნებს სოციალურ ქსელში:
“ღრმად მწამს, რომ ჩვენი არაჩვეულებრივი ქვეყნის ისტორიის, კულტურის, თვითმყოფადობის შენარჩუნების საუკეთესო და მე ვიტყოდი, ერთადერთი გზა, სწორედ ევროპულ და ევროატლანტიკურ სტრუქტურებში ინტეგრაციაა. ეს არის ქართველი ხალხის ისტორიული, მტკიცე არჩევანი და ამ გზაზე აუცილებლად ვივლით წინ!
სწორედ ევროპული ოჯახის სრულფასოვანი წევრობა არის ის, რისკენაც საქართველო, უკრაინა და მოლდოვა მიისწრაფვის და მე მჯერა, ჩვენ, ერთად ამ მიზანს აუცილებლად მივაღწევთ!
მინდა, კიდევ ერთხელ განსაკუთრებული მადლობა ვუთხრა ევროპელ მეგობრებს, რომელთა თანადგომა და დახმარება ჩვენი ქვეყნის წინსვლისა და გაძლიერების გზაზე ფასდაუდებელია!
ერთად უფრო ძლიერები ვართ! გილოცავთ ევროპის დღეს!” – წერს ფეისბუქის პირად გვერდზე კახა კუჭავა.
