საპარლამენტო ფრაქცია “ერთიანი ნაციონალური მოძრაობა – ძალა ერთობაშიას” თავმჯდომარე, ხატია დეკანოიძე, სოციალურ ქსელში გამოქვეყნებული პოსტით, მიხეილ სააკაშვილთან მიმართებაში ხელისუფლების წარმომადგენლების მიერ გამოთქმულ მოსაზრებებს ეხმაურება და მწვავე საპასუხო შეფასებებს აკეთებს:
“მიხეილ სააკაშვილმა ჭამოს და ამით მოგვარდება ყველაფერი“ – არის სრული სიცრუე. ეს უთანაბრდება არაადამიანურ დამოკიდებულებას. ამ დიაგნოზის მთავარი გამოწვევა არის ის, რომ მიშას არ აქვს მინიმალური პირობა ჯანმრთელობის რეაბილიტაცია მოხდეს. ანორექსია ნიშნავს, რომ ადამიანი ვერ იღებს საკვებს. სურვილი – საკვები მიიღოს განკურნებას ვერ მოიტანს.
“ქართული ოცნების“ ამომრჩეველს მინდა ვკითხო: როგორ წარმოუდგენიათ საქართველოს ევროპული მომავალი, თუ მესამე პრეზიდენტი ციხეში მოგვიკვდება, როგორ წამოუდგენიათ ჩვენი შვილების ცხოვრება უმძიმეს მოვემულობაში, რაც შეიძლება ძალიან მალე დადგეს? რატომ შეიძლება საკუთარ ქვეყანას არგუნო ეს განუკურნებელი ხვედრი? დაფიქრდით.
რა ამაზრზენია დასცინო ადამიანს, რომელიც უმძიმეს მდგომარეობაშია. ეს საკუთარი თავის დამცირებაა. საკუთარი სტანდარტის ყველაზე დაბალი ხარისხია.
“ქართული ოცნება” საკუთარ ქვეყანას უცხადებს ომს, როცა ყოფილი პრეზიდენტის გამოცხადებულ სიკვდილს ელოდება“, – აცხადებს ხატია დეკანოიძე.
ინფორმაციისთვის: “ქართული ოცნების” თავმჯდომარე ირაკლი კობახიძემ მიხეილ სააკაშვილთან მიმართებაში განაცხადა, რომ “კაცს შეუძლია მიიღოს ცილა და არ იღებს ცილას. კეთილი ინებოს, მიიღოს და დამთავრდება ამით ყველაფერი“.