წარმოებას დროებით შეჩერებასთან დაკავშირებით მინერალური და მტკნარი წყლების მწარმოებელი კომპანია “IDS ბორჯომი საქართველო” სპეციალურ განცხადებას ავრცელებს და მიზეზებს განმარტავს:
“გაცნობებთ, რომ უკრაინაში საომარი მოქმედებების დაწყების დღიდან კომპანია “IDS ბორჯომი საქართველო” მძიმე ვითარებაში აღმოჩნდა. კომპანიის პროდუქციის რეალიზაციის ძირითად ბაზრებზე შექმნილ რთულ ვითარებას დაემატა საბანკო ანგარიშებზე შეზღუდული წვდომა, რამაც კომპანიას ჩაუკეტა სავალუტო შემოსავლების მიღებისა და კრედიტორებთან ანგარიშსწორების შესაძლებლობა.
კომპანია დღემდე სიტუაციის არსებითი გამოსწორების იმედით აგრძელებდა ფუნქციონირებას, რაც სამწუხაროდ ამ დრომდე ვერ მოხერხდა.
აღნიშნულის გათვალისწინებით კომპანია იძულებულია, ა.წ. 29 აპრილიდან, ბორჯომის ჩამომსხმელ ორივე ქარხანაში, წარმოების პროცესი დროებით შეაჩეროს.
იმედს ვიტოვებთ, რომ ვითარება უახლოეს მომავალში გამოსწორდება და მოგვეცემა ფუნქციონირების განახლების შესაძლებლობა“, – ნათქვამია განცხადებაში.