“HUB Georgia”-ს აღმასრულებელი დირექტორი, სოხუმის აეროდრომისთვის საერთაშორისო აეროპორტის სტატუსის მინიჭების გეგმებთან დაკავშირებით, რუსული პროპაგანდისტული საინფორმაციო საშუალებების მიერ გავრცელებულ ინფორმაციას ეხმიანება.
“გუშინ, პუტინის პროპაგანდისტულმა საინფორმაციო საშუალებებმა, გაავრცელეს ინფორმაცია, თითქოს რამდენიმე წლის შემდეგ, სოხუმის აეროდრომს მიენიჭება საერთაშორისო აეროპორტის სტატუსი და დღეში 5 ათასამდე მგზავრს მოემსახურება. ეს, რა თქმა უნდა, ტყუილი და მორიგი პროვოკაციული ნაბიჯია რუსეთის მხრიდან.
დიახ, ძალიან მალე, როცა აღდგება საქართველოს ტერიტორიული მთლიანობა და მოხდება ჩვენი ტერიტორიების დეოკუპაცია, სოხუმს ნამდვილად ექნება მსოფლიოში ერთ-ერთი ყველაზე თანამედროვე და ლამაზი აეროპორტი და ის მოემსახურება მგზავრებს მთელი მსოფლიოდან. აფხაზეთი გახდება სამოთხე ყველა იმ ადამიანისთვის, ვინც იქ იცხოვრებს და დასასვენებლად ჩავა, სოხუმი კი – ერთ-ერთი ყველა სწრაფად განვითარებადი ტურისტული ქალაქი მსოფლიოში, ისეთივე როგორიც დღეს ბათუმია. ამას ჩვენ აუცილებლად შევძლებთ, მას შემდეგ რაც დამარცხდება ბოროტების იმპერია, პუტინის დამპყრობლური და კაცთმოძულე რეჟიმი, მას შემდეგ რაც აფხაზეთი კვლავ საქართველოს განუყოფელი ნაწილი გახდება.
მანამ, სანამ რუსეთის ფედერაციას აქვს ოკუპირებული ჩვენი ტერიტორიები, სამწუხაროდ, ამის განხორციელება შეუძლებელია. საქართველოს ნებართვის გარეშე შეუძლებელია სოხუმის აეროპორტმა მიიღოს საერთაშორისო აეროპორტის სტატუსი. ამას მკაცრად არეგულირებს საერთაშორისო სამოქალაქო ავიაციის ორგანიზაცია (ICAO), რომელიც აფხაზეთს საქართველოს ტერიტორიად აღიარებს. იმისთვის, რომ ICAO-მ სოხუმის საერთაშორისო აეროპორტს მიანიჭოს შესაბამისი კოდი, მასზე საქართველოს სამოქალაქო ავიაციის სააგენტომ უნდა გასცეს ვარგისობის სერთიფიკატი და მუდმივ რეჟიმში განახორციელოს უსაფრთხო ექსპლუატაციაზე ზედამხედველობა, რაც ოკუპირებული ტერიტორიების შემთხვევაში შეუძლებელია.
მიუხედავად ამისა, თუ რომელიმე რუსული ავიაკომპანია მაინც შეასრულებს ფრენებს, თუნდაც რუსეთის ტერიტორიიდან სოხუმის მიმართულებით, ის დაარღვევს საქართველოს კანონს “ოკუპირებული ტერიტორიების შესახებ” და წინააღმდეგობაში მოვა სამოქალაქო ავიაციის საერთაშორისო ნორმებთან”, – აცხადებს ვასო ურუშაძე.