“გენერალურმა პროკურორმა განაცხადა, რომ მიხეილ სააკაშვილის ყველა უფლება არის დაცული” – დიმიტრი საძაგლიშვილი

საქართველოს მე-3 პრეზიდენტის ადვოკატი დიმიტრი საძაგლიშვილი მედიასთან კომენტარს აკეთებს გენერალური პროკურორის, ირაკლი შოთაძის განცხადებაზე მიხეილ სააკაშვილის საქმესთან დაკაშირებით და აღნიშნავს, რომ გაჟღერებული პოზიცია არის არაკვალიფიციური:

,,გენერალურმა პროკურორმა განაცხადა, რომ მიხეილ სააკაშვილის ყველა უფლება არის დაცული და ვციტირებ – “ეს არის ფაქტი“. მაშინ, როდესაც მოგეხსენებათ მიმდინარეობს გამოძიება მიხეილ სააკაშვილის მიმართ არაადამიანური მოპყრობის ფაქტზე. აი ამ გამოძიების გამო სახელმწიფო ინსპექტორის სამსახური გააუქმეს საერთოდ და ეს გააკეთა ,,ქართული ოცნების“ ხელისუფლებამ 3 დღეში.

ბუნებრივია, ამის შემდეგ ჩვენ არ გვაქვს მოლოდინი, რომ გამოძიება ობიექტურად წარიმართება, მაგრამ გენერალური პროკურორის მხრიდან წინასწარ იმის დაანონსება, რომ მიხეილ სააკაშვილის უფლებები არის დაცული ისე, რომ გამოძიება ჯერ დასრულებული არ არის – ცხადია, რომ ჩვენთვის არის პასუხი ყველაფერზე. უპირველეს ყოვლისა პასუხი იმაზე, რომ არანაირად არ არის პროკურატურა ორგანო, რომელიც ორიეტირებულია დანაშაულის რეალურად გამოძიებაზე, არამედ ეს არის ორგანო, რომელიც ორიენტირებულია ბიძინა ივანიშვილის ხელისუფლების შენარჩუნებაზე“, – განაცხადა დიმიტრი საძაგლიშვილმა.

ავტორი
ნინი ხიჯაკაძე