„ვერ დაგეთანხმებით იმაში, რომ რუსეთთან ფინანსურად ჩაბმა და სანქციებთან არ მიერთება არის გზა ჩვენი ევროკავშირში წევრობისთვის’’ – ასე უპასუხა „სტრატეგია აღმაშენებლის’’ წევრმა თეონა აქუბარდიამ ბიუროს სხდომაზე „ევროპელი სოციალისტების“ წევრ ფრიდონ ინჯიას, მის მიერ დასმულ კითხვაზე – „ხომ არ დადგა დრო, როგორც ეს გააკეთა თურქეთმა და სხვა ქვეყნებმა, მათ შორის, ჩინეთმა, Мир-ის სისტემას შევუერთდეთ?“.
აქუბარდიას თქმით აუცილებელია ამ კუთხით ცალსახად იყოს წითელი ხაზი გავლებული თუ სად არის საქართველო:
“როდესაც რუსეთის ფართომასშტაბიანი ომი უკრაინის წინააღმდეგ საფრთხეს უქმნის საქართველოსაც, როგორც პოლიტიკურად ასევე ეკონომიკურად, ბატონ ფრიდონს ვერ დავეთანხმები ერთის მხრივ ევროკავშირში განაცხადის შეტანასთან დაკავშირებით მისალმებაში და მეორეს მხრივ რუსულ სამყაროზე ჩაბმასთან მიმართებაში. ეს ორი რადიკალურად განსხვავებული რამ არის – ან ვართ ცივილიზებული დასავლეთის მხარეს ან ვებმებით რუსეთს და ვრჩებით იქით, სადაც 30 წელია ვცდილობთ, რომ აღარ დავბრუნდეთ.
ამიტომ ამ კუთხით ცალსახად უნდა იყოს წითელი ხაზი თუ სად არის საქართველო. ჩვენი ქვეყანა უნდა იყოს ცივილიზებულ დასავლეთთან და ვერაფრით ვერ დაგეთანხმებით იმაში, რომ რუსეთთან ფინანსურად ჩაბმა და სანქციებთან არ მიერთება არის გზა ჩვენი ევროკავშირში წევრობისთვის”, – განაცხადა თეონა აქუბარდიამ.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
