“N12 პენიტენციურ დაწესებულებაში შოთა თუთბერიძესა და სპეციალური პენიტენციური სამსახურის ერთ-ერთ მოსამსახურეს შორის გარკვეულ ინციდენტს ჰქონდა ადგილი” – “სპეციალური პენიტენციური სამსახური”

სპეციალური პენიტენციური სამსახურის განცხადებას ავრცელებს, N12 პენიტენციურ დაწესებულებაში მიხეილ სააკაშვილის ადვოკატსა და სამსახურის ერთ-ერთ მოსამსახურეს შორის გარკვეულ ინციდენტთან დაკავშირებით:

“ადვოკატ შოთა თუთბერიძის მიერ გავრცელებულ ინფორმაციასთან დაკავშირებით, განვმარტავთ, რომ მიმდინარე წლის 2 მარტს, N12 პენიტენციურ დაწესებულებაში შოთა თუთბერიძესა და სპეციალური პენიტენციური სამსახურის ერთ-ერთ მოსამსახურეს შორის გარკვეულ ინციდენტს ჰქონდა ადგილი.

სპეციალური პენიტენციური სამსახური, აღნიშნული ფაქტის სრულყოფილად შესწავლის მიზნით, შესაბამის საგამოძიებო უწყებებთან მაქსიმალურად ითანამშრომლებს. საქმეზე დაწყებულია გამოძიება საქართველოს სისხლის სამართლის კოდექსის 333-ე მუხლის ,,ბ’’ პუნქტით.

ასევე, აღნიშნულ ფაქტზე, სპეციალური პენიტენციური სამსახურის მონიტორინგის დეპარტამენტის მიერ დაწყებულია მოკვლევა და ინციდენტში მონაწილე პირს, პენიტენციური სამსახურის გარე დაცვის სამმართველოს ინსპექტორს, შეუჩერდა სამსახურებრივი უფლებამოსილება.

სპეციალური პენიტენციური სამსახური კიდევ ერთხელ განმარტავს, რომ მის დაქვემდებარებაში არსებულ ყველა პენიტენციურ დაწესებულებაში, სრულად არის დაცული, როგორც ბრალდებულთა/მსჯავრდებულთა, ასევე, მათთან ვიზიტად მყოფი პირების უფლებები“, – ნათქვამია გავრცელებულ განცხადებაში.

ინფორმაციისათვის: შოთა თუთბერიძემ გუშინ განაცხადა, რომ პენიტენციურ სამსახურში, უწყების თანამშრომლის მხრიდან, მის წინააღმდეგ მოხდა სიტყვიერი შეურაცხყოფა და განხორციელდა ფიზიკური ძალადობა:

,,ვაპირებთ, რომ განცხადებით მივმართოთ საგამოძებო უწყებებს. დარწმუნებული იყოს ეს ვაჟბატონი, რომ ყველა ზომას მივმართავ იმისთვის, რომ დაისაჯოს კანონის შესაბამისად. ჩანს როგორ ადამიანებს ეყრდნობა ხელისუფლება მიხეილ სააკაშვილის რეპრესირების დროს“, – განაცხადა შოთა თუთბერიძემ.