საქართველოს საპარლამენტო დელეგაციამ, საქართველოს პარლამენტის თავმჯდომარის შალვა პაპუაშვილის ხელმღვანელობით, ბრიუსელში, ნატო-ს შტაბ-ბინაში, ნატო-საქართველოს კომისიის (NGC) შეხვედრაში მიიღო მონაწილეობა. პარლამენტის თავმჯდომარე ნატო-საქართველოს კომისიის სხდომაზე სიტყვით გამოვიდა.
კომისიის სხდომაზე პარლამენტის თავმჯდომარემ ისაუბრა ოკუპირებულ ტერიტორიებზე არსებულ ვითარებაზე, არსებულ საფრთხეებზე და საპარლამენტო დღის წესრიგზე.
ამასთან დაკავშირებით შეფასება და განმარტებები გააკეთა საქართველოს პარლამენტის საგარეო საკითხთა კომიტეტის თავმჯდომარემ. მისი თქმით, ნატო-ს წევრი სახელმწიფოების წარმომადგენლების მხრიდან კიდევ ერთხელ აღინიშნა საქართველოს განსაკუთრებული როლი, როგორც შავი ზღვის რეგიონის უსაფრთხოების, ასევე სამხრეთ კავკასიაში სტაბილურობისა და მშვიდობის უზრუნველყოფაში.
„ჩვენ წარვდექით საკმაოდ მოცულობითი ანგარიშით, თუ რა ხდება საქართველოში, რა ხდება ოკუპირებულ ტერიტორიებზე, იქ არსებული ვითარება, საფრთხეები რომელიც ჩვენ გაგვაჩნია. ასევე ვისაუბრეთ საპარლამენტო დღის წესრიგზე, რა რეფორმების გატარებას აპირებს პარლამენტი, მომავალი სამი წლის განმავლობაში და რა პროგრესი გვაქვს აქამდე.
ნატო-ს წევრი ქვეყნებისგან მივიღეთ საკმაოდ დიდი შექება ჩვენი ძალიან მნიშვნელოვანი როლისათვის, სამხრეთ კავკასიაში მშვიდობის და სტაბილურობის უზრუნველსაყოფად. ეს იყო ხაზგასმით გამოკვეთილი და ასევე მივიღეთ შექება იმ რეფორმებისთვის, რომელიც აქამდე საქართველომ გაატარა“, – განაცხადა ნიკოლოზ სამხარაძემ.
ინფორმაციას პარლამენტის საზოგადოებასთან ურთიერთობისა და ინფორმაციის დეპარტამენტი ავრცელებს
