ლიტერატურის მუზეუმის დირექტორი ლაშა ბაქრაძე ლაშა ბაქრაძე კულტურის მინისტრ თეა წულუკიანს მიმართავს და წიგნთან “ელენე ბაქრაძე (დარიანი) – მოგონებები, წერილები, დღიურები, ლექსები” დაკავშირებით შექმნილი სიტუაციის განხილვას სთავაზობს საჯაროდ, ნებისმიერ სივრცეში თუ მედიაში:
“როგორც ქალბატონმა თეა წულუკიანმა ბრძანა, ჩვენს მიერ გამოცემული წიგნი „ელენე ბაქრაძე (დარიანი) – მოგონებები, წერილები, დღიურები, ლექსები“ „სერიოზული განხილვის“ საგანი უნდა გახდეს.
მაღალი საზოგადოებრივი ინტერესიდან გამომდინარე, ვფიქრობ, კარგი იქნება ეს განხილვა შედგეს ღიად და გამჭვირვალედ, საჯარო სივრცეში, დაინტერესებული მედიის დასწრებით – ლიტერატურის მუზეუმში ან მაგ. მწერალთა სახლში, მაგრამ თუ ეს მიუღებელია – სატელევიზიო ლაივ გადაცემაში, იქ სადაც ქალბატონი თეასთვის კომფორტული გარემო იქნება – პირველ არხზე ან თუნდაც იმედზე.
მე კოვიდ იზოლაცია დღეს დამიმთავრდა და ხვალ ვაპირებ სამინისტროში შეხვედრაზე მისვლას აუდიტთან, 12 საათზე, სადაც ხაზგასმით ცალკე, ჩემთვის შეუტყობინებლად, არის დაპატიჟებული ჩემი მოადგილე და წიგნის რედაქტორი ქალბატონი თეა თვალავაძე.
ყოველი შემთხვევისათვის, თან ვურთავ 11 იანვრის ლაბორატორიული კვლევის შედეგს კოვიდის „მომიზეზებასთან“ დაკავშირებით“, – წერს ფეისბუქის პირად გვერდზე ლაშა ბაქრაძე.
ინფორმაციისთვის: ელენე ბაქრაძის (დარიანი) წიგნში აღმოჩენილ შეცდომასთან დაკავშირებით, რამდენიმე დღის წინ, კულტურის სამინისტროს განცხადება მოჰყვა, რასაც სოციალურ ქსელში ლაშა ბაქრაძე განმარტებებით გამოეხმაურა.