“ისტორია გვასწავლის – თუ პრობლემის წინაშე სირაქლემასავით თავს მიწაში ჩარგავ, იგივე პრობლემა გაათმაგებულად მოგიბრუნდება მომავალში” – მამუკა გამყრელიძე

უკრაინასთან დაკავშირებით ისტორიაში ერთგვარ მცირე ექსკურსს გვთავაზობს პარტია “ევროპული დემოკრატების” გენერალური მდივანი, მამუკა გამყრელიძე:

“მცირე ექსკურსი უახლეს ისტორიაში.

1994 წელს უკრაინა შეუერთდა “ბირთვული იარაღის არგავრცელების” 1968 წლის ხელშეკრულებას. ცხადია უკრაინამ მოითხოვა უსაფრთხოების გარანტიები. სწორედ ამ გარანტიების გაცემას შეეხებოდა ბუდაპეშტის ოთხმხრივი მემორანდუმი, რომელსაც ხელი მოაწერეს კლინტონმა, ელცინმა, მეიჯორმა და კუჩმამ.

2014 წელს რუსეთმა უხეშად დაარღვია ყველა არსებული საერთაშორისო ხელშეკრულება, მათ შორის ბუდაპეშტის მემორანდუმიც და მოახდინა ყირიმის ანექსია.

იმავე 2014 წელს, როცა აშშ-ს პრეზიდენტი იყო ობამა, ხოლო ვიცეპრეზიდენტი ბაიდენი, აშშ-ს იუსტიციის სამინისტროს მთავარი იურისკონსულტის სამმართველომ (U.S. Department of Justice’s Office of Legal Counsel) გამოუშვა დადგენილება, რომ ბუდაპეშტის მემორანდუმი “…არ არის არც ხელშეკრულება და არც შეთანხმება, რომლის შესრულება აუცილებელია”.

შედეგები:
1. რუსეთი დღეს კვლავ ემუქრება უკრაინას ოკუპაციით, რითიც საფრთხეს უქმნის ევროპისა და მსოფლიოს უსაფრთხოებას;
2. ბარაქ ობამა ნობელის მშვიდობის პრემიის ლაურეატია;
3. ჯო ბაიდენი აშშ-ს პრეზიდენტია.

P.S. ისტორია გვასწავლის – თუ პრობლემის წინაშე სირაქლემასავით თავს მიწაში ჩარგავ, იგივე პრობლემა გაათმაგებულად მოგიბრუნდება მომავალში,” – წერს ფეისბუქის პირად გვერდზე მამუკა გამყრელიძე.