“ეს ჩემთვის არის სიკვდილი და შეურაცხყოფა, მაგრამ როცა ხალხის და ქვეყნის ინტერესებზეა საუბარი, ამ შემთხვევაში პირადი ემოცია და შეურაცხყოფა მეორეხარისხოვანია” – შალვა ნათელაშვილი პარლამენტში შესვლასთან დაკავშირებით

ტელეკომპანია “TV პირველზე” თოქ-შოუ “რეაქციაში”, ლეიბორისტული პარტიის თავმჯდომარემ შალვა ნათელაშვილმა პარლამენტში შესაძლო შესვლასთან დაკავშირებით ისაუბრა და განაცხადა, რომ ეს გადაწყვეტილება მისი პირადი ტრაგედია იქნება, მაგრამ რიგ მიზეზთა გამო შეიძლება გადადგას ეს ნაბიჯი:

“ფაქტი ერთია, რომ ხალხი არ გამოდის პარლამენტიდან, არ ტოვებენ, პარლამენტის ახალ არჩევნებზე არავინ საუბრობს, არავის უნდა და ჩვენ ვკარგავთ ტრიბუნას, სადაც შეიძლება ხალხის შიგ პირში ვუთხრათ იმ გაქსუებულ მილიარდერ ბიძებს თუ მამიდებს, რომლებიც ბიუჯეტს ეზიდებიან სახლში.

მაგრამ, ვიმეორებს, ეს ჩემი პირად სურვილი არ არის შეიძლება ეს ჩემი ტრაგედიაც იყოს, იმიტომ რომ 25 წელია ვიბრძვი იმისათვის, რომ უმრავლესობით მოვიდე და ხალხს რაღაცა გავუკეთო – ღარიბს შვება მივცე, უმუშევარს სამუშაო ვაშოვნინო, სწავლის მსურველს განათლების საშუალება მივცე, ავადმყოფს წამალი და ექიმის უზრუნველყოფა გავუკეთო, ტერიტორიული მთლიანობა აღვადგინო… ამას ყველაფერს უმრავლესობით მოსვლა უნდოდა და არა ერთი დეპუტატით შეკინკილება.

ეს ჩემთვის არის სიკვდილი და შეურაცხყოფა, მაგრამ როცა ხალხის და ქვეყნის ინტერესებზეა საუბარი, ამ შემთხვევაში პირადი ემოცია და შეურაცხყოფა მეორეხარისხოვანია. ამიტომ მზად ვიქნები ეს ნაბიჯი გადავდგა, თუ პარტია მიიღებს გადაწყვეტილებას და რა თქმა უნდა სოციალურ ქსელებში ჩვენ გავაკეთებთ მოსახლეობის გამოკითხვას – რას იტყვის ხალხი,” – აცხადებს შალვა ნათელაშვილი.