საქართველო პატარა, თუმცა დიდი ხედვის მქონე ქვეყანაა, რომელიც იმ გზაჯვარედინზე იმყოფება, სადაც აღმოსავლეთი ხვდება დასავლეთს, ჩრდილოეთი – სამხრეთს, უძველესი ტრადიციები – ინოვაციებსა და თანამედროვე ტექნოლოგიებს და სადაც ეკონომიკური შესაძლებლობები უხვადაა, – ამის შესახებ საქართველოს პრემიერ-მინისტრმა მამუკა ბახტაძემ კალიფორნიის Commonwealth club-ში საჯარო გამოსვლისას განაცხადა.
მთავრობის მეთაურმა ყურადღება გაამახვილა საქართველოში არსებულ შესაძლებლობებსა და აშშ-თან მჭიდრო სტრატეგიულ პარტნიორობაზე. საქართველოს უფრო ახლოს გასაცნობად, პრემიერ-მინისტრმა, სიმბოლურად გამოიყენა სამი რიცხვი და მათი განმარტებით ნათელი მოჰფინა ჩანაფიქრს, ქვეყნის სათანადო მხრიდან წარმოსაჩენად:
“შევეცდები, სამი რიცხვით დაგამახსოვროთ საქართველო: ესენია 1, 28 და 8000:
პირველი რიცხვია 1 – საქართველოში პირველად გვყავს ქალი პრეზიდენტი, სალომე ზურაბიშვილი. ის პირველი ქალი პრეზიდენტია საქართველოში და მთელს რეგიონში და არჩეულია 2018 წლის საპრეზიდენტო არჩევნებზე 6-წლიანი ვადით. თავად არჩევნებიც ისტორიული მოვლენაა ჩვენი ქვეყნის წინსვლის გამო მრავალფეროვნებისა და დემოკრატიის მიმართულებით;
მეორე რიცხვია 28. – ზუსტად ამდენი წელია, გავთავისუფლდით საბჭოთა კავშირიდან და დემოკრატიული განვითარების საკუთარ გზას დავადექით, როგორც დამოუკიდებელი ერი. სიამაყით ვაცხადებ, რომ შეერთებული შტატები საქართველოს გვერდით იდგა ამ გზაზე ყველა ნაბიჯის გადადგმისას;
მესამე რიცხვი 8 000-ია, სწორედ ამდენი წლის ისტორიას ითვლის ღვინის წარმოება საქართველოში” – განაცხადა მამუკა ბახტაძემ.
საქართველოში ღვინის წარმოების ტრადიცია ხაზგასმით წარმოაჩინა მთავრობის მეთაურმა და ამ თემაზე კონკრეტული ფაქტებით ისაუბრა:
“არქეოლოგების კვლევების შედეგად, საქართველო მსოფლიოში მეღვინეობის სამშობლოდაა აღიარებული. საქართველოში მეღვინეობის ტრადიცია 8 000 წლის წინ დაიწყო, დამწერლობის შექმნამდე 3 000, ხოლო რკინის ხანის დაწყებამდე 5 000 წლით ადრე. ქართული დამწერლობაც კი ვაზის ლერწმის მოხაზულობას წააგავს. ქართული წარმოშობისაა ვაზის ბევრი ჯიში, რომელიც დღეს ევროპასა და აზიაში მოჰყავთ. ამ სასმელის აღმნიშვნელი სიტყვა დასავლეთის ბევრ ქვეყანაში განსხვავებულადაა დამკვიდრებული, თუმცა ყველა მათგანი სავარაუდოდ ქართული ძირისაგან წარმოსდგება და ჟღერადობითაც წააგავს ღვინოს” – აღნიშნა საქართველოს პრემიერ-მინისტრმა.
და, აქვე, მიზანშეწონილად ჩათვალა კიდევ ერთხელ გაესვა ხაზი მეღვინეობის მრავალსაუკუნოვანი ტრადიციისთვის, უკვე რუსეთთან მიმართებაში:
“ახლა, 8000-წლიანი მეღვინეობის ტრადიციისა და საბჭოთა ოკუპაციის 70-წლიანი გამოცდილების შემდეგ რუსეთს არ მივცემთ ჩვენი მომავლის განსაზღვრის უფლებას” – განაცხადა მამუკა ბახტაძემ.
