“არასტაბილურობის და დესტაბილიზაციის შემქმნელი ადამიანები არიან ციხეში” – ირაკლი ღარიბაშვილი

საქართველოს პრემიერ-მინისტრი ირაკლი ღარიბაშვილი საკმაოდ მწვავე და ირონიულ კომენტარს აკეთებს მე-3 პრეზიდენტის მისამართით და აცხადებს, რომ მიხეილ სააკაშვილი არის ქვეყნის ტრაგედია და სირცხვილია. მთავრობის მეთაურის თქმით, ახლა უკვე შესაძლებელია ქვეყნის მიხედვა, რადგანაც დესტაბილიზაციის შემომტანი ადამიანები უკვე ციხეში არიან:

,,ეჭვი არ გვეპარება და ვიცით, რომ ეს ადამიანი არ არის ნორმალური. როგორ შეიძლება, რომ ამ კაცზე სერიოზული წარმოდგენა დარჩეს რომელიმე ადამიანს?! – მაგრამ ეს ტრაგედიაა და ჩვენი სირცხვილია! ეს კაცი მართავდა ქვეყანას 9 წლის განმავლობაში. ამას თუ მართვა ჰქვია… – ჩაგრავდა ჩვენს მოსახლეობას და ანადგურებდა ჩვენი ქვეყნის მომავალს, პერსპექტივებს.

ქურდულად შემოიპარა და აღმოჩნდა ციხეში. რა ვქნათ?! – ეს არის რეალობა! რა თქმა უნდა, ძალიან კარგი საჩუქარი გაუკეთა ჩვენს ამომრჩეველს 1 ოქტომბერს, როცა თავის ფეხით შევიდა ციხეში.

კიდევ ერთხელ მე მინდა, მივულოცო ჩვენს მოსახლეობას. სრული პასუხისმგებლობით მინდა ვთქვა, რომ გვაქვს რეალური შანსი საბოლოოდ მივხედოთ ქვეყანას – დავამშვიდოთ, დავაწყნაროთ. ვინაიდან ეს არასტაბილურობის და დესტაბილიზაციის შემქმნელი ადამიანები არიან ციხეში“, – განაცხადა ირაკლი ღარიბაშვილმა.

ავტორი
ნინი ხიჯაკაძე