„ქართული ოცნება“ მიხეილ სააკაშვილის და „ნაციონალური მოძრაობის“ საფრთხობელად ქცევის ხარჯზე, ცდილობს ამ არჩევნებს დაუკარგოს მნიშვნელობა და აზრი – ამის შესახებ პოლიტიკური პლატფორმა „მესამე ძალა-სტრატეგია აღმაშენებლის“ თბილისის მერობის კანდიდატმა, თამარ კეკენაძემ პირველი არხის ეთერში დედაქალაქის მერობის კანდიდატების დებატებზე განაცხადა.
კეკენაძის თქმით ბიძინა ივანიშვილმა და „ ქართულმა ოცნებამ“ სრულად ჩამოშალა სახელმწიფო.
როგორც მან აღნიშნა, იმისთვის რომ დასრულდეს პოლარიზება და დაპირისპირება ქვეყანაში, საჭიროა 2 ოქტომბერს დავიწყოთ ცვლილებები:
„უკვე 9 წელია, რაც ბიძინა ივანიშვილმა და „ქართულმა ოცნებამ“ სრულად ჩამოშალა ქართული სახელმწიფო, ქვეყანას დაუნგრია ფუნქცია და თითოეულ ჩვენგანს გაუნადგურა მომავალი.
უკვე, რამდენი არჩევნებია ჩვენ ვხედავთ, რომ „ქართული ოცნება“ მიხეილ სააკაშვილის და „ნაციონალური მოძრაობის“ საფრთხობელად ქცევის ხარჯზე ცდილობს ამ არჩევნებს დაუკარგოს შინაარსი და საერთოდ დაუკარგოს აზრი. ჩვენ თუ გვინდა, რომ დავასრულოთ ეს პოლარიზება და დაპირისპირება, 2 ოქტომბერს ცვლილება უნდა დავიწყოთ ახალი ძალით, იმ ადამიანებთან ერთად ვინც არის საქმეზე ორიენტირებული, “მესამე ძალა-სტრატეგია აღმაშენებლის“ გუნდთან ერთად, რომელსაც აქვს კომპლექსური ხედვა არა მხოლოდ თბილისის არამედ მთელი ქვეყნის განვითარების.
ჩვენი თბილისის ხედვა ეფუძვნება 3 ძირითად პრიორიტეტს და ამოცანას ეს არის – პირველ რიგში სამუშაო ადგილების შექმნა, მეორე საშუალო ხელფასის გაზრდა და მესამე მცირე და საშუალო ბიზნესისთვის ხელ შეწყობა.
მინდა მივმართო არა მხოლოდ თბილისელებს არამედ საქართველოს ყველა მოქალაქეს, ჩვენი “მესამე ძალა-სტრატეგია აღმაშენებლის” მიზანია, რომ დავასრულოთ ბიძინა ივანიშვილის “ქართული ოცნების” მმართველობა და ამავდროულად არ დავუშვათ ძველი ხელისუფლების, მიხეილ სააკაშვილის პარტიის დაბრუნება”, – განაცხადა თამარ კეკენაძემ.
ინფორმაციას პოლიტიკური პლატფორმა “გიორგი ვაშაძე – მესამე ძალა – სტრატეგია აღმაშენებლის” მედიასთან და საზოგადოებასთან ურთიერთობის სამსახური ავრცელებს
