“მესამე ძალა-სტრატეგია აღმაშენებელში” აცხადებენ, რომ სამტრედიაში მათი მაჟორიტარობის კანდიდატი გუშინ მთელი დღის განმავლობაში, “ქართული ოცნების” მხრიდან დავალებით, უკანონო თავისუფლების აღვეთაში იმყოფებოდა, რა დროსაც მასზე ხორციელდებოდა მუქარა, რათა სამტრედიაში, ბაში-იანეთის სამაჟორიტარო ოლქში კანდიდატურა მოეხსნა. ფაქტთან დაკავშირებით საგანგებო ბრიფინგზე შეფასებები გააკეთა პარტიის ლიდერმა გიორგი ვაშაძემ. ოპოზიციონერი ლიდერის თქმით, ამ კრიმინალურ გეგმაში “ქართული ოცნების” წარმომადგენლების გარდა კრიმინალური ავტორიტეტები და საარჩევნო კომისიის წარმომადგენლებიც იყვნენ ჩართულნი:
“მოხდა სისტემური დანაშაულის ფაქტი, რომელშიც ჩართული არიან კრიმინალები, “ქართული ოცნების” საარჩევნო შტაბი და საოლქო საარჩევნო კომისია. გუშინ რვა საათის მანძილზე ფაქტიბრივად უკანანოდ იყო დაკავებული ნიკა საკანდელიძე, სამტრედიის ბაში-იანეთის ჩვენი მაჟორიტარობის კანდიდატი. მთელი ამ ხნის მანძილზე მასზე მიმდინარეობდა ზეწოლა, რომ მას დაეწერა განცხადება და მოეხსნა კანდიდატურა მაჟორიტარული ოლქიდან. ის არის ოთხი შვილის მამა და მას ემუქრებოდნენ საკუთარი შვილებით, ემუქრებოდნენ და ეუბნებოდნენ, რომ მისი შვილები აქ თამაშობდნენ საფეხბურთო მოედანზე და ვერ ნახავ.
საბოლოოდ, რამდენიმე საათიანი ზეწოლის შემდეგ, მათ აიძულეს, რომ დაეწერა განცხადება. ეს განცხადება დაიწერა “ქართული ოცნების” სამტრედიის შტაბში, შემდგომ გადაეცა, როგორც მას უთხრეს, საოლქო საარჩევნო კომისიის მდივანს და ჩვენთვის სრულიად მოულოდნელად ტელეკომპანია “იმედის” მიერ გავრცელებული განცხადებით გახდა ცნობილი, რომ მან მოხსნა კანდიდატურა.
დაახლოებით საღამოს ექვს საათზე ვიპოვეთ ეს ადამიანი და მან სრულად აღწერა ფაქტი, რაც მოხდა. ეს არის ენით აღუწერელი დანაშაული, რომელსაც ჩადის “ქართული იცნება”, კრიმინალები და საარჩევნო ადმინისტრაცია. რაღა თქმა უნდა დაუყოვნებლივ მოვითხოვთ აღნიშნული განცხადების გაუქმებას. ჩვენ ამ ინფორმაციას მივაწვდით საერთაშორისო სადამკვირვებლო ორგანიზაციებს, დაუყოვნებლივ მოვითხოვთ ყველა იმ კრიმინალის დაკავებას, რომელიც ჩართული იყო ამ უმძიმეს დანაშაულში. ასევე მოვითხოვთ დაკავებას “ქართული ოცნების” იმ შტაბის წევრების, რომლებიც ჩართულნი იყვნენ ამ დანაშაულებრივ სქემაში და საოლქო საარჩევნო კომისიიდან ვითხოვთ იმ ადამიანების განთავისიფლებას, ვინც შეხმატკბილებულად მოქმედებდა ამ საკითხთან დაკავშირებით.
ასევე მივმართავთ სახალხო დამცველს და ყველა ინსტიტუციას იმისათვის, რომ დაცული იყოს ნიკას უფლებები. ეს არ არის ერთადერთი ინციდენტი, მაგრამ ამ ადამიანმა გამოიჩინა ვაჟკაცობა, უკან არ დაიხია და ყველაფერზე ღიად ისაუბრა”, – განაცხადა გიორგი ვაშაძემ.
ინფორმაციას პოლიტიკური პლატფორმა “გიორგი ვაშაძე – მესამე ძალა – სტრატეგია აღმაშენებლის” მედიასთან და საზოგადოებასთან ურთიერთობის სამსახური ავრცელებს
